Jambyl oblysy PD eks-basshysynyń orynbasary para alǵany úshin 6 jylǵa sottaldy
ASTANA. KAZINFORM – Taraz qalalyq №2 soty Jambyl oblystyq polıtsııa departamenti bastyǵynyń burynǵy orynbasary Jaıdarbek Quttybaev pen Talas aýdandyq polıtsııa bólimi bastyǵynyń burynǵy mindetin atqarýshy Erken Abaevqa qatysty úkim shyǵardy.
Sot Jaıdarbek Quttybaevty kináli dep tanyp, 6 jylǵa bas bostandyǵynan aıyrdy. Erken Abaev 5 jylǵa sottaldy. Sonymen qatar ekeýine de ómir boıyna memlekettik qyzmette jáne quqyq qorǵaý organdarynda qyzmet atqarýǵa tyıym salynyp, arnaıy ataqtarynan aıyrý týraly sheshim qabyldandy.
Sottalýshylardyń ekeýi de taǵylǵan aıyptardy moıyndamaǵan. Olar istiń qoldan qurastyrylǵanyn aıtyp, ózderin aqtaýdy suraǵan.
Sot jaryssózinde memlekettik aıyptaýshy buǵan deıin suralǵan jaza merzimderin ózgerissiz qaldyrýdy talap etti. Al qorǵaýshylar aıyptaý negizinen jábirlenýshiniń kórsetýlerine súıengenin, is materıaldarynda jetkilikti dálel joq ekenin málimdedi.
Jaıdarbek Quttybaev sońǵy sózinde polıtsııa organdarynda 29 jyl qyzmet etkenin aıtyp, tergeý usynǵan derekter onyń kinásin dáleldemeıtinin jetkizdi.
«Eger men shynymen aqsha alǵan bolsam, jábirlenýshige qatysty tártiptik keńes ótkizbes edim. Bul aıyptaý nusqasynyń ózine qaıshy keledi», – dedi ol.
Sondaı-aq ol jábirlenýshi qaýipsizdik qyzmeti ókilderiniń yqpalymen ózine qarsy aıǵaq bergenin jáne tergeý barysynda jaýabyn birneshe ret ózgertkenin aıtty.
Erken Abaev ta kinásin moıyndamady. Onyń qorǵaýshylary aıyptaý daýly aıǵaqtarǵa negizdelgenin jáne tikeleı dálelderdiń joq ekenin alǵa tartty. Sotta qosymsha qorǵaýshy retinde sóz sóılegen ákesi de sarapshy áńgimelerdiń stenogrammasynan para berý faktisin rastaıtyn naqty málimet tappaǵanyn málimdedi.
Úkimdi jarııalaý kezinde sýdıa sot barysynda kýálardyń jaýaptary tyńdalyp, olardyń aıǵaqtary ózge dáleldermen salystyrylǵanyn atap ótti.
«Sottalýshylar istiń kóptegen mán-jaılarymen keliskenimen, aqsha alý faktisin joqqa shyǵardy. Alaıda sot olardyń kinási tolyq dáleldendi degen qorytyndyǵa keldi», – dedi sýdıa.
Úkim zańdy kúshine engen joq. Sottalǵandardyń týystary sheshimmen kelispeıtinderin aıtyp, joǵary turǵan sotqa shaǵym túsiretinderin málimdedi.
Aıta keteıik, buǵan deıin Shymkenttiń eks-sheneýnikterine qatysty is taǵy sozylýy múmkin ekeni habarlandy.
