Jambyl oblysy Qazaqstandy strategııalyq mańyzdy hımııa ónimderimen qamtyp otyr

ASTANA. KAZINFORM – Jambyl oblysy Qazaqstandy strategııalyq mańyzy bar hımııa ónimderimen 100% qamtamasyz etip otyr. Bul týraly Jambyl oblysynyń ákimi Erbol Qarashókeev esep berý brıfınginde aıtty.

Ákimniń aıtýynsha, oblystyń jalpy óńirlik ónimi 7,9%-ǵa ósti. Osy jyldyń 10 aıynda qysqamerzimdi ekonomıkalyq ósim 109,8% deńgeıinde qalyptasty.

Ónerkásip óniminiń kólemi 17%-ǵa, aýyl sharýashylyǵy — 3,1%-ǵa, qurylys jumystary — 18,8%-ǵa, turǵyn úı — 1,7%-ǵa, saýda — 0,5%-ǵa, kólik — 2,9%-ǵa, baılanys — 9,4%-ǵa, negizgi kapıtalǵa ınvestıtsııa — 38,3%-ǵa artty.

— Jyl basynan beri óńirde 1,1 trln teńgeniń ónerkásip ónimi shyǵaryldy. Ónerkásip ósimi boıynsha Jambyl oblysy respýblıkada 3-orynda, al óńdeý ónerkásibinde — 5-orynda. Jalpy óndiris kóleminiń shamamen 63%-y óńdeý ónerkásibine tıesili, — dedi E. Qarashókeev Ortalyq kommýnıkatsııalar qyzmetinde.

Munda Jambyl oblysy respýblıka boıynsha kóshbasshylyq pozıtsııasyn berik ustap tur: óńirde Qazaqstanda óndiriletin natrıı trıpolıfosfaty, natrıı tsıanıdi, ammofostyń, sary fosfordyń 100%-y jáne qanttyń 40%-y óndiriledi.

— Jyl basynan salaǵa 203,8 mlrd teńge kóleminde ınvestıtsııa tartylyp (2,1 ese ósim), óńdeý ónerkásibi óniminiń eksporty 1,5 esege ulǵaıdy (270,4 mln dollar), bul respýblıka boıynsha 1 oryn, — dedi oblys ákimi.

Aıta keteıik, oblysta Qazaqstanda alǵashqy iri natrıı tsıanıdi zaýytynyń qurylysy bastaldy.