Jambyl oblysy ákimdiginiń ǵımaratyn jóndegen merdiger lıtsenzııasynan aıryldy

TARAZ. KAZINFORM — Sot oblystyq ákimdik ǵımaratynyń kúmbezin jóndeý kezinde jol berilgen keshiktirý men sapasyzdyq jónindegi isti qarady. Merdiger tapsyrý merzimin buzyp, birqatar aqaýlarǵa jol bergen. Osylaısha, merdiger kompanııa memlekettik satyp alýdyń josyqsyz qatysýshysy dep tanyldy, dep habarlaıdy Kazinform agenttiginiń tilshisi.

Oblystyq ákimdik kúmbezin jóndeý tóńiregindegi daýdy sotqa deıin jetpeýi kerek edi. ıAǵnı ǵımarat qalanyń ortalyǵyndaǵy sáýletti nysandardyń biri sanalady jáne jóndeý jumystary tez ári artyq daý-damaısyz aıaqtalýy tıis edi. Alaıda merdigerdiń jumysty ýaqytynda bitirmegeninen bólek, aqaýlary kózge anyq kórinip turǵandyqtan, tapsyrys berýshi sotqa júginýge májbúr bolǵan.

24 mln teńgeden asatyn kelisimshart osy jyldyń maýsym aıynda jasalǵan. Jumysty oryndaýǵa 60 kúntizbelik kún berilgen. Biraq sot anyqtaǵandaı, jóndeý jumystary ýaqytynda aıaqtalmaǵan, al jekelegen elementterdiń sapasy talaptarǵa saı kelmegen.

Bıylǵy qyrkúıekte júrgizilgen tekserý barysynda ákimdik komıssııasy birqatar kemshilikterdi anyqtady: 23 áınek qarańǵylanbaǵan, shytynaǵan áınekter aýystyrylmaǵan, myrysh jalatylǵan qańyltyrlar maıysqan jáne konstrýktsııada sańylaýlar bar, lıýk ornatylmaǵan, kúmbez ishinde qurylys qaldyqtary qalyp qoıǵan.

Merdiger keshigýdiń ózi tapsyrys berýshiniń ótinishi boıynsha bolǵanyn alǵa tartty. ıAǵnı ákimdik ǵımarattyń ortalyq bóligine jurt nazaryn artyq aýdartpaý úshin shyny panelderdi tolyq buzýǵa ruqsat bermegen kórinedi. Sotta ákimdik ókili kezeń-kezeńimen aýystyrý talaby bolǵanyn rastaǵanymen, bul merdigerdiń jumysty sapaly ári ýaqytynda oryndaý mindetin joqqa shyǵarmaıtynyn atap ótti.

Іs qorytyndysy boıynsha kompanııa 743 myń teńgeden astam somadaǵy aıyppuldy erikti túrde tóledi. Sondyqtan sot aıyppul óndirý talabyn qanaǵattandyrýdan bas tartty, biraq sonymen birge merdigerdi memlekettik satyp alýdyń josyqsyz qatysýshysy dep tanydy.

Eske sala ketsek, Almatyda eki qurylys kompanııasy lıtsenzııasynan aıyrylǵanyn jazǵanbyz. Artynsha Almatyda taǵy birneshe qurylys kompanııasy men tehnıkalyq qadaǵalaý uıymdary lıtsenzııasynan aıyryldy.