Jambyl murasy sahnada: Astanada aqynnyń shyǵarmalary oryndaldy

ASTANA. KAZINFORM – Elordada Jambyl Jabaevtyń 180 jyldyǵyna arnalǵan kontsert ótip, onda aqynnyń jyrlary, aıtystary men ánderi oryndaldy. Rýhanı keshke elimizdiń ár óńirinen kelgen dástúrli óner ókilderi qatysyp, uly aqynnyń shyǵarmashylyq murasyn kópshilikke usyndy.

v

Kontsertti QR Mádenıet jáne aqparat mınıstrliginiń qoldaýymen Roza Baǵlanova atyndaǵy «Qazaqkontsert» memlekettik akademııalyq kontserttik uıymy uıymdastyrdy. Baǵdarlama Jambyldyń aqyndyq, jyrshylyq jáne mýzykalyq murasyn qamtydy.

Qazaqstannyń eńbek sińirgen qaıratkeri Erbolat Shaldybekovtiń aıtýynsha, kontsertke Jambyl shyǵarmalaryn oryndaıtyn ónerpazdar arnaıy shaqyrylǵan. Keshte aqynnyń tól týyndylarymen qatar, onyń shyǵarmashylyǵyna arnalǵan basqa avtorlardyń eńbekteri de oryndaldy.

ch
Foto: Kazinform

– Búgingi kontsert Jambyl Jabaevtyń 180 jyldyq mereıtoıy qarsańynda uıymdastyrylyp otyr. Baǵdarlamada aqynnyń kóptegen shyǵarmasy qamtylǵan. Onyń ishinde Jambyldyń óz nusqasyndaǵy «Qyzylbek» dastany, «Kóroǵly» jyry, Kenen Ázirbaevtyń «Jambyl jyr» týyndysy jáne Jambyl men Aıkúmistiń aıtysy bar. Sonymen birge Jetisý óńiriniń shyǵarmashylyq murasy men Jambyldyń sózine jazylǵan qazirgi kompozıtorlardyń týyndylary da oryndalady, – dedi Erbolat Shaldybekov.

Onyń aıtýynsha, kontserttiń taǵy bir ereksheligi – oǵan ár býynnyń ókilderi qatysyp, dástúrli ónerdiń jalǵastyǵyn kórsetti. Sahnada jas oryndaýshylarmen qatar, orta jáne aǵa býyn ónerpazdary da óner kórsetti.

Kesh baǵdarlamasynda Jambyldyń «Jıyrma bes», «Sarybaıǵa», «Qaıta kelgen jastyq», «Jaz», «Alǵadaı», «Aqyndarǵa arnaý», «Úgáı-úgáı» shyǵarmalary oryndaldy. Sondaı-aq Shashýbaı, Nartaı, Maıasar, Qalqa syndy aqyndardyń týyndylary jas ánshilerdiń oryndaýynda jańǵyrdy.

a
Foto: Kazinform

Kontsert aıasynda kórnekti kompozıtor Ermurat Úsenovtiń «Jambylǵa arnaý» atty jańa shyǵarmasy alǵash ret oryndaldy. Týyndyny «Astana sazy» qazaq memlekettik folklorlyq ansambli usyndy.

Buǵan qosa, Súıinbaı Aronulynyń, Qaban jyraýdyń, Kenen Ázirbaevtyń, Tólegen Mombekovtiń, Latıf Hamıdıdiń shyǵarmalary, halyq ánderi men kúıleri oryndaldy. Ulttyq bı óneri de kontserttiń kórkemdik mazmunyn tolyqtyrdy.

Rýhanı keshke Erbolat Shaldybekov, Gúlnıza Jumajanova, Perızat Turarova, Kúnsulý Túrikpen, Aıaýlym Qamajan, Perızat Omarbekova, Birjan Aıtahmet, Maqpal Toqtaǵanova jáne basqa da ónerpazdar qatysty. Sondaı-aq «Astana sazy» qazaq memlekettik folklorlyq ansambli men «Gúlder» ansambli óner kórsetti.

Aıta keteıik, buǵan deıin, osyndaı kontsert Beıjińde atalyp ótkenin habarlaǵan edik.