Jambyl men Qyzylorda oblystarynda respýblıkalyq mańyzy bar avtojoldar jabyldy
TARAZ. KAZINFORM - Aýa raıynyń qolaısyzdyǵyna (qalyń qar, boran jáne kórinýdiń shektelýi) baılanysty «Batys Eýropa — Batys Qytaı» halyqaralyq kólik dáliziniń Taraz qalasynan Túrkistan oblysynyń shekarasyna deıingi (534-593 shq) bóligi jabyldy.
Sonymen qatar «Merki-Shý-Býrylbaıtal» avtojolynyń 161 shaqyrymynan (Birlik aýyly) 273 shaqyrymyna deıin (Býrylbaıtal aýyly) avtokólik quraldarynyń barlyq túrine shekteý engizildi.
«Atap aıtsaq, Taraz qalasynyń mańynda 350 júk kóligi men 50 jeńil avtokólik, Baızaq aýdanyndaǵy Aqsholaq stantsııasynda 100 júk kóligi, T.Rysqulov aýdany Aqyrtóbe aýylynyń mańynda 200 kólik jáne Qordaı aýdany Qaınar aýylynda 200 avtokólik toqtap tur. Júrgizýshiler men jolaýshylar tıisti qajettiliktermen qamtamasyz etilýde.
Jergilikti atqarýshy organdardyń, polıtseıler, tótenshe jaǵdaı departamentiniń qyzmetkerleri turǵyndarǵa tıisti kómek kórsetip, kólikterdi qar qursaýynan shyǵarý úshin naqty sharalar qabyldaýda», — dep jazdy jergilikti ákimdikten.
Azamattardy evakýatsııalaý maqsatynda avtojoldardyń jabyq ýchaskelerinde ýaqytsha jylytý pýnktteri qurylǵan, sondaı-aq, evakýatsııalaýǵa arnalǵan tehnıkalar daıyndalǵan.
Qazirgi tańda Jýaly aýdany B.Momyshuly aýylyndaǵy orta mektep bazasynda ornalastyrylǵan jylytý pýnktine buǵan deıin jetkizilgen 25 adamnyń 12-si (13-i poıyzben ketken) ornalasqan. Olar ystyq tamaq, tósek oryn jáne ózge de qajettiliktermen qamtamasyz etildi.
Aıta keteıik, óńirdegi barlyq aýdandarda kommýnaldyq qyzmetter kúsheıtilgen jumys rejımine kóshirildi.
Tótenshe jaǵdaılar departamentinde jedel shtabtyń jumysy uıymdastyrylyp, qaýyrt jeli iske qosyldy.
Joldardy tazalaý jumystary jalǵasýda.
«QazAvtoJol» AQ Qyzylorda oblysy boıynsha fılıaly da óńirde respýblıkalyq mańyzy bar jolda kólik qozǵalysyna shekteý qoıylǵanyn málimdedi.
«2 aqpanda Astana ýaqytymen 00 saǵat 30 mınýttan bastap, Qyzylorda oblysy aýa raıynyń kúrt nasharlaýyna baılanysty (qarly boran jáne kórý shekteý) respýblıkalyq mańyzy bar M-32 „Samara-Shymkent“ avtomobıl jolynyń 1911-2055,5 shaqyrym aralyǵyna (Shıeli aýdanynan Túrkistan oblysynyń shekarasyna deıin) barlyq kólikterdiń qozǵalysyna ýaqytsha shekteý qoıyldy», — delingen habarlamada.
