2025 jyly Qazaqstanda 2,1 mln gektar jerde shegirtke taralýy boljanyp otyr

ASTANA. KAZINFORM — Bul derekter 27 mamyrda Premer-mınıstr orynbasary — ulttyq ekonomıka mınıstri Serik Jumanǵarınniń tóraǵalyǵymen Úkimette ótken shegirtkege qarsy kúres jónindegi respýblıkalyq shtabta aıtyldy, dep habarlaıdy Úkimettiń baspasóz qyzmeti.

Bul ótken jylmen salystyrǵanda 1 mln ga-ǵa az bolǵanmen, ásirese, Qostanaı (650 myń ga), Aqtóbe (512,9 myń ga) jáne Batys Qazaqstan (134,5 myń ga) oblystarynda kóptep taralýy múmkin. Barlyq óńirde monıtorıng júrgizilip, qorǵanys sharalary jasalyp keledi.

— 27 mamyrdaǵy jaǵdaı boıynsha, shegirtkeniń paıda bolý ornyn anyqtaý úshin 4,1 mln ga jer zertteldi. Dernásilder qonys tepken jalpy aýmaq 1,1 mln ga. Onyń ishinde 667,8 myń ga aldaǵy ýaqytta óńdeledi. Jalpy 596,3 myń ga óńdeldi. Jambyl oblysynda marokkalyq shegirtkege qarsy hımııalyq óńdeý aıaqtalyp, ıtalııalyq prýsqa qarsy shara jalǵasýda. Túrkistan oblysyndaǵy jumys aıaqtalyp qaldy. Óńirde barlyǵy 370,6 myń ga óńdelip, tazalaý jumysy júrgizilip jatyr, — dedi aýyl sharýashylyǵy vıtse-mınıstri Ermek Kenjehanuly.

Úıirli shegirtkege qarsy hımııalyq óńdeý Abaı (4 myń ga), Aqmola (6 myń ga), Aqtóbe (51,9 myń ga), Almaty (6,3 myń ga), Atyraý (10,1 myń ga), Shyǵys Qazaqstan (1,4 myń ga), Jetisý (21,8 myń ga), Batys Qazaqstan (16,2 myń ga), Qaraǵandy (4,5 myń ga), Qostanaı (40,6 myń ga), Ulytaý (1,8 myń ga) men Qyzylorda (13,1 myń ga) oblystarynda da júrgizilip jatyr. Pavlodar men Soltústik Qazaqstan oblysynda ıtalııalyq prýsqa qarsy sharalar óńdeletin alań anyqtalǵannan keıin bastalady.

Eske salsaq, úıirli shegirtkemen kúreske respýblıkalyq bıýdjetten 7,1 mlrd teńge bólingen. Bıylǵy maýsymda 443 mamandandyrylǵan búrký tehnıkasy, onyń ishinde 31 asa jeńil avıatsııa kemesi, 24 ushaq pen 49 UUA jumys isteıdi. Barlyq óńirde jergilikti jumysty úılestirý úshin oblys ákimderiniń orynbasarlary basqaratyn jedel shtabtar qurylǵan.

Jalpy respýblıka boıynsha 4 625-teı adam tekserý jumysyna kirisken. Bul ótken jylmen salystyrǵanda eki ese kóp. 2024 jyly Aýyl sharýashylyǵy mınıstrligi 56 agrodron satyp alǵan edi. Onyń 7-eýi shegirtkeniń taralý oshaǵyn anyqtaýǵa, 49-y hımııalyq óńdeýge arnalǵan.

— Osy maýsymda zertteýshi drondar Túrkistan oblysynda shegirtke oshaǵyn óte dál anyqtaýda. Búginde ol Jambyl, Aqtóbe, Qostanaı, Qyzylorda, Batys Qazaqstan men Ulytaý oblystarynda da qoldanylyp jatyr, — dedi Ermek Kenjehanuly.

Búrikkish drondar qazirdiń ózinde barlyq óńirde kóptep qoldanylýda. Onyń kómegimen 52,5 myń gektar jerdi óńdeý josparlanyp otyr.

Shtab otyrysynda Serik Jumanǵarın zııankesten qorǵaný sharalary qyzý júrgizilip jatqan óńirlerdi tyńdady. Atap aıtqanda, Qyzylorda oblysynda qatty jeldiń jáne shegirtke dernásiliniń adam aıaǵy jetpeıtin jerge uıalaýynyń saldarynan hımııalyq óńdeýge áýe tehnıkasynyń shamasy jetpeýde. Mólsherden tys kóp pestıtsıd te qajet. Vıtse-premer osyndaı jaǵdaıda jumys isteı alatyn gaz generatory sekildi jerústi tehnıkasyn kóptep jetkizýdi tapsyrdy.

— Áli de shegirtke tabıǵı taralý tsıkliniń shyńyna jetken joq. Eginge zııan keltirmeý úshin óńirdegi jaǵdaıǵa oraı jedel áreket etýimiz kerek. Týyndaǵan problemalardy tez sheshý úshin respýblıkalyq shtabtyń apta saıynǵy otyrysyn ótkizýimiz qajet. Búgingi otyrysta qabyldanǵan sheshim, eki kúnniń ishinde Qyzylorda oblysyna qajetti dári-dármek pen qosymsha tehnıka jetkizilýi tıis, — dep qorytyndylady Serik Jumanǵarın.

Osydan buryn Aýyl sharýashylyǵy mınıstri shegirtkege qarsy kúreste avıatsııa sanyn arttyrýdy tapsyrdy.