Jambyl Ermekuly: Sportshynyń ata-anasy bolý – baqyt
ASTANA.KAZINFORM – Short-trekten Qazaqstan quramysynyń mushesi, Harbın qysqy Azııa oıyndarynyń kúmis júldegeri Malıka Ermektiń ákesi Jambyl Ermekuly Kazinform tilshisine eksklıýzıvti suhbat berip, sportshynyń jetistikke jetýine qýanyshty ekenin aıtty.

Jambyl Ermekulynyń aıtýynsha, qyzdary halqaralyq dodada baq synap jatqanda, otbasy ol úshin qatty qobaljyǵan.
– Jarysty tikeleı eferden tamashaladyq. Ol kezdegi sezimdi aıtyp jetkize almaımyn. Óte qatty qobaljydyq. Jekeleı synda óner kórsetken kezde ózim alańda bolǵandaı kúı keshtim. Ókinishke qaraı, fınaldyq synda besinshi keldi. Negizi, jaqsy nátıje kórsetti. Alaıda sportshylar bir orynda turmaıdy, alǵa qaraı jyljyp jatyr. Bile bilseńiz, 2017 jyly osy nátıjemen chempıon atanatyn edi, - deıdi sportshynyń ákesi.
Ol sonymen qatar Malıkanyń short-trek sportyna qalaı kelgenin aıtyp berdi.

– 2011 jyly elimizde qysqy Azııa oıyndary ótken kezde mende bir kisilik úlesimdi qosyp jumys atqardym. Sol kezde elimizde short-trekten sportshylar tym az ekenin baıqap, qyzymdy soǵan baýlıyn dep sheshtim. Ol kezde Malıkany ulken tennıske aparatyn edik. Azıada aıaqtalǵannan keıin short-trekke apardym. Jattyqtyrýshy ony qabyldady, Malıkanyń ózine de osy sport unady. Osydan keıin, anasy jumystan bas tartyp, qyzymyzdy jattyǵýlarǵa ózi aparyp turdy,- dedi Jambyl Ermekuly.
Sondaı-aq, Jambyl myrza sportshynyń ata-anasy bolý qandaı sezim ekenin aıtty.

– Negizi, sportshynyń ata-anasy bolý baqyt dep oılaımyn. Balańyz jetistikke jetip jatqanda barlyǵy kelip quttyqtap jatady. Óziń jetpegen bıikke urpaǵyń jetse, ata-ana úshin osydan úlken baqyt joq shyǵar, - deıdi Malıkanyń ákesi
Jambyl Ermekulynyń aıtýynsha, otbasy bul kúnde Malıkadan basqa taǵy úsh sportshy ul tárbıelep otyr.
– Úıde taǵy úsh sportshy ulym bar. Malıka óte eńbekqor. Bala kúninen jattyǵýǵa muqııat. Demalys kezinde de formasyn saqtaý úshin jattyǵý jasaıtyn. Meniń oıymsha, osy jetistikke jetýine onyń qajyrlyǵy jáne osy eńbekqorlyǵy kóp septigin tıgizdi. Biz ata-ana retinde ózimiz jasaý kerek isimizdi jasadyq, baǵyt-baǵdar kórsettik,- deıdi Jambyl myrza.
Aıta keteıik, astanalyqtar búgin Nursultan Nazarbaev halyqaralyq áýejaıynda short-trekten el quramasyn saltanatpen qarsy aldy.
Eske salsaq, Malıka Ermek Qytaıdyń Harbın qalasynda ótken ІH qysqy Azııa oıyndarynnyń short-trekten áıelder arasynda 1000 metrge syrǵanaýdan fınalda óner kórsetip, besinshi oryn alǵan edi.
Harbınde, Malıka áıelder arasynda 3000 metrge estafetadan jarys jolyna shyǵyp, Qazaqstan qorjynyna tarıhı kúmis medal syılady.