Jamby atýdyń sheberleri júldege talasyp jatyr
ASTANA. KAZINFORM – V Dúnıejúzilik kóshpendiler oıyndarynyń alǵashqy saıysy ótip jatyr. «Qazanat» ıppodromy mańyndaǵy etnoaýylda jamby atýdan kil myqtylar básekege túsýde.
Sportshylar jamby atý sport túriniń Majar stıli boıynsha baq synasyp jatyr.
Saıysqa 27 memleketten 78 sportshy qatysýda. Qazaqstan quramasy sapynda Aıtbek Sarybaı, Eralhan Aıkóz, Batyr Beksaýyt, Abzal Týlybekov el qorjynyna júlde salýǵa nıetti.
Aıta ketý kerek, sportshylarymyz buǵan deıin Álem, Eýropa chempıonattarynda júldeli oryndardy ıemdengen.
Jamby atý – at ústindegi dástúrli sadaq atý sporty. Dástúrli at ústinde sadaq atý jarysy 4 stılde ótkiziledi: koreı stıli, túrik stıli, vengr stıli, qazaq stıli (jamby atý). Komanda quramynda 4 sportshy bolady jáne ár stıl boıynsha bir sportshy synǵa túsedi. Jarys jolynyń uzyndyǵy – 100 metr, eni – 3 metr.
