Olımpıada júldegerlerinen kem emes: Jamby atýshylardy kim jarylqaıdy
ASTANA. KAZINFORM – Búgin jamby atýdan jarys kúni aıaqtaldy. Qazaqstan sportshylary jaqsy nátıje kórsetti deýge tolyq negiz bar. Bul rette, Alageum Electric kompanııasy basshylyǵy júlde alǵan sportshylarǵa jáne ulttyq quramanyń bas bapkerine qomaqty syılyq tabystamaq.
Atap aıtsaq, 1-oryn ıegerine bir bólmeli páter, 2-oryn alǵan sportshyǵa avtokólik, 3-oryn ıelengenderge 5 mıllıon teńgeden úlestirilmek. Al jamby atýdan ulttyq qurama bas bapkerine avtokólik syıǵa tartylmaq.
«Ulttyq sportymyz – jamby atýdy damytý úshin ári jigitterimizge jiger berý maqsatynda syıaqy taǵaıyndaımyn dep sheshim qabyldaǵan edim. Endi, mine, ulttyq qurama sportshylary Dúnıejúzilik kóshpendiler oıyndarynda eki altyn, eki kúmis, eki qola júldege ıe boldy. El senimin aqtap, úzdik nátıje kórsetip otyr», – dedi Alageum Electric kompanııasynyń Dırektorlar keńesiniń tóraǵasy, Jamby atý federatsııasynyń prezıdenti Erkebulan Іlııasov.
Osylaısha, bir altyn, bir kúmis alǵan Batyr Beksaýytqa bir bólmeli páter beriledi. Bir altyn, bir qola ıelengen Eralhan Aıkózge avtokólik tabystalady. Kúmis jáne qola júlde alǵan Aıtbek Sarybaıǵa 5 mıllıon teńge aqshalaı syıaqy tartý etilmek.
Aıta keteıik, jamby atýdan sportshylar majar, azııa, túrik jáne jamby stılinen synǵa túsken bolatyn.
