Jamby atýda eki qazaqstandyq mergen fınalǵa shyqty
ASTANA. KAZINFORM — Búgin 5-shi Dúnıejúzilik kóshpendiler oıyndarynda dástúrli sadaq atýdyń jamby nysanasyn kózdeýden saıys ótip jatyr. Ázirge 2 qazaqstandyq mergen fınalǵa shyqty.
Jamby nysanasynda erler de, áıelder de 30 metr qashyqtyqta nysana kózdeıdi. Munda ár sportshyǵa 5 múmkindikten beriledi, ár múmkindikte 2 mınýt ýaqyt bolady jáne 5 jebe atylady.
Upaı sany teń túsken jaǵdaıda 5 jebemen taǵy bir múmkindik beriledi. Taǵy da teń tússe — 1 jebeden 1 múmkindik beriledi.
Eger osy múmkindikte de teń upaı bolsa, tsıfrlanǵan nysanǵa 1 oqtan 1 múmkindik beriledi. Bul tásil jeńimpaz anyqtalǵansha qaıtalanady.
Sońynda eń joǵary upaı jınaǵan sportshy jeńimpaz atanady.
Jarys qorytyndysy boıynsha erler arasynda qazaqstandyq Jánibek Qulmyrzaev pen Baqbergen Sálim, rýmynııalyq Alın Mıhaı Týdoran jáne reseılik Gafýr Rahmangýlov aqtyq saıysqa shyqty.
Áıelder arasynda qazaqstandyq sportshylar fınalǵa shyǵa almady, júldeli oryndarǵa reseılik Anna Alekseeva, majarstandyq Hýnıne Domokos, ındonezııalyq Sýrı Reno jáne túrkııalyq Aıshegúl Demırbag talasady.
Fınal oıyndary búgin Astanadaǵy «Arǵymaq» at-sport kesheninde saǵat 16:00–de bastalady.
Aıta keteıik, saıystyń alǵashqy kúni Jánibek Qulmyrzaev Pýta nysanasyn kózdeýde altyn júlde jeńip alǵan edi.
Sonymen birge, mergender Erbol Tápenov — kúmis, Qanat Qasymhan — eki qola jáne Aıkórkem Batıhan — taǵy bir qola júldeni el qanjyǵasyna saldy.
