Jamaýbaev shetelge zańsyz shyǵarylǵan qarajatty qaıtarý is-sharalary týraly aıtty
«Shetelge zańsyz áketilgen qarajatty jáne onda satyp alynǵan aktıvterdi qaıtarý jónindegi usynystar boıynsha búgingi tańda salyqtyq ákimshilendirý maqsatynda aqparat almasý bóliginde halyqaralyq yntymaqtastyqta quqyqtyq baza daıyndaldy. Atap aıtqanda, qarjylyq shottar boıynsha avtomatty túrde aqparat almasý týraly Kópjaqty kelisim aıasynda 62 ıýrısdıktsııadan aqparat alý rásimdeldi. Bul 2019 jyldan beri kezeńdi qamtıdy», - dedi mınıstr.
Erulan Jamaýbaevtyń atap ótýinshe, AQSh Úkimetimen Halyqaralyq salyq tártibin jetildirý jónindegi kelisimniń ratıfıkatsııalanýy maquldandy. Onyń arqasynda eki el rezıdentteriniń qarjylyq shottary týraly ózara aqparat almasýy júzege asyrylatyn bolady.
«Calyq tóleýden jaltarý jáne kapıtaldy syrtqa shyǵarý bóliginde halyqaralyq sharttardyń erejelerin teris paıdalanýdy boldyrmaý jónindegi kópjaqty konventsııa ratıfıkatsııalandy. Memleket basshysynyń tapsyrmalaryn eskere otyryp, barlyq múddeli memlekettik organdar basshylarynyń qatysýymen jumys toby quryldy. Kapıtaldy elge qaıtarý jáne shetelge, onyń ishinde offshorlyq ıýrısdıktsııalarǵa qarajattyń ketýine qarsy baǵyttalǵan is-sharalardy kúsheıtý jóninde naqty usynystar ázirlenetin bolady», - dedi ol.
Mınıstr munan bólek dıvıdendterge salyq salý, materıaldyq emes qyzmetter jáne baqylanatyn sheteldik kompanııalar boıynsha shegerimdi shekteý jóninde zańnamalyq túzetýler ázirlengenin aıtty.
«Sondaı-aq, Ekonomıkalyq yntymaqtastyq jáne damý uıymy elderiniń úzdik tájirıbelerin eskere otyryp, transferttik baǵa belgileý máseleleri boıynsha zań qabyldanady. Osy baǵyt boıynsha naqty usynystar eki aı ishinde Memleket basshysyna usynylady», - dedi Erulan Jamaýbaev.
