Jamaýbaev bankterdi naqty sektordy kóbirek kredıtteýge yntalandyrý sharalaryn atady
ASTANA. KAZINFORM — Ulttyq bank 9 aıda aınalynan 3,2 trln teńgeni alyp tastady. Bul týraly Quryltaı otyrysynda «2027-2029 jyldarǵa arnalǵan respýblıkalyq bıýdjet týraly» zań jobasyn tanystyrǵan Ulttyq bank tóraǵasynyń orynbasar Erulan Jamaýbaev aıtty.
— Biz altyn satyp alý operatsııalaryn teńestirýdi jalǵastyramyz. Naqtyraq aıtatyn bolsaq, kásiporyndardan altyn satyp alý kezinde aınalymǵa artyq aqsha massasy shyǵarylady. Onyń ınflıatsııaǵa áseri bolmas úshin shetel valıýtasyn satý arqyly sol qarajat qaıtarylady. Bıyl tek 9 aıdyń ishinde 3,2 trln teńge aınalymnan alyndy. Jyl sońyna deıin shamamen taǵy da 900 mlrd teńge alynady dep josparlanǵan, — dedi UB tóraǵasynyń orynbasary.
Erulan Jamaýbaevtyń aıtýynsha, qabyldanyp jatqan makro jáne mıkroprýdentsııalyq sharalar nátıjesinde tutynýshylyq kredıtteý naryǵynyń qalpyna kelýi jáne onyń teńgerimdi ósýi baıqalady.
— Qazir bankter jeke tulǵalarǵa neǵurlym kóbirek tutyný kredıtterin berse, tıisinshe soǵurlym óz kapıtaldaryn arttyrýy tıis. Bul kontrtsıkldik býfer dep atalady. 1 qazannyń ahýaly boıynsha qalyptasqan bankterdiń kapıtal býferiniń shamasy 550 mlrd teńgeden asty, — dedi ol.
Onyń atap ótýinshe, bankterdiń múddelerin bıznesti kredıtteýge baǵyttaý maqsatynda bıyldan bastap olardyń tabysyna saralanǵan salyq salý engizildi, ıaǵnı bólshek nesıeleýden túsken tabystar boıynsha korporatıvtik tabys salyǵynyń mólsherlemesi 25%, al bıznesti kredıtteý boıynsha 20% boldy.
— Bul basqa da sharalarmen birge bankterdi naqty sektordy kóbirek kredıtteýge yntalandyrady. Sonyń arqasynda bólshek nesıe portfeliniń jyldyq mánde ósýi 11,6% bolsa, bızneske berilgen kredıtter portfeli 14,2%-ǵa artqan, — dedi Erulan Jamaýbaev.
Buǵan deıin baǵa turaqtylyǵynda táýekelder saqtalyp otyrǵanyn jazǵan edik.
