Jamanqulovtyń sybaılastary aqshany qalaı jymqyrǵandaryn aıtyp berdi
ASTANA. QazAqparat - Medeý aýdandyq №2 sotynda «Fenıks» kınokartınasynyń túsirilimine bólingen bıýdjettik qarajatty jymqyrý qylmystyq isi boıynsha tergelip jatqan kúdiktiler búgin sot aldynda alǵashqy jaýaptaryn berdi, dep habarlaıdy QazAqparat.
Sot aldyna birinshi bolyp, kınokartınanyń prodıýseri Natalıa ıÝdına shyqty. Aıta ketý kerek, ol óziniń kinásin tolyq moıyndap, 2 mıllıon teńge shyǵyn ótep bergen bolatyn.
«2014 jyly maýsymda Tuńǵyshbaı Jamanqulov «Fenıks» fılminiń óndirisine bólingen qarajattan 6 mıllıon teńge alyp, berip jiberýdi tapsyrdy. Men 5,3 mıllıon teńgeni berip, bul tapsyrmany oryndadym», - dep atap ótti sottalýshy.
Natalıa ıÝdına atalmysh qarajat qandaı joldarmen qoldy bolǵanyn aıtyp berdi. 1 mıllıon teńgege jýyq qarajat «Alma Store» JShS dırektory, kúdikti Marlen Ábishevtiń arasynda kelisimshart jasaý arqyly jymqyrylǵan. Ol kelisimshart boıynsha, Ábishevtiń kompanııasy «Fenıks» fılminiń túsirilimine qajetti beınequrylǵylar, baılanys jáne kólik qatynasymen qamtamasyz etýi tıis bolǵan. Alaıda tergeý barysynda anyqtalǵanyndaı, atalmysh JShS sol beti eshqandaı qyzmet kórsetpegen. Onyń ústine 1,3 mıllıon teńge «AlekSh» atty basqa da jalǵan kásiporyn arqyly alynǵan.
Taǵy 2,3 mıllıon teńge kúdikti Ilıa Korobeınıkovtyń, atap aıtqanda oǵan tıesili «SKARABEI STUDIO» jeke kásipkerligi arqyly alynǵan.
300 myń teńge júrgizýshi Vladımır Rýsnakovty jumysqa alý týraly jalǵan kelisimsharty arqyly jymqypylǵan. Natalıa ıÝdına qujatqa júrgizýshiniń qolyn ózi qoıǵan. Qalǵan 717 myń teńge Tuńǵyshbaı Jamanqulovtyń tapsyrmasymen «T.K. TURAN UNIVERSAL BUSINESS» JShS esepshisi Nazgúl Júnisovanyń kómegimen alynǵan.
Sonymen qatar Tuńǵyshbaı Jamanqulov Natalıa ıÝdınaǵa kartına rejısseri Talǵat Janybekovke, smetada kórsetilmese de, jalǵa alynǵan páter aqysyn tóleýdi mindettegen. Osylaısha, ıÝdına túrli jeke kásipkerler arqyly Janybekovke 1,2 mıllıon teńge bergen.
Aıta ketken jón, Tuńǵyshbaı Jamanqulovqa 1 mıllıon teńge sheship bergen Marlen Ábishev ıÝdınanyń jaýaptaryn shyndyqqa janasatynyn rastady jáne óz kinásin moıyndady.
