Jamanqulovtyń isi boıynsha fıgýranttyń ótinishi qanaǵattandyrylmady
ALMATY. QazAqparat - Almaty qalasynyń №2 Medeý aýdandyq soty «Fenıks» fılminiń túsirilimine arnalǵan bıýdjet qarajatyn jymqyrý faktisi boıynsha «Sh. Aımanov atyndaǵy «Qazaqfılm» AQ laýazymdy tulǵalary men «T.K. Turan Universal Business» JShS qyzmetkerlerine qatysty sot jalǵasýda, dep habarlady «QazAqparat» HAA tilshisi.
Іs boıynsha 9 adam sottalyp jatyr: QR halyq ártisi Tuńǵyshbaı Jamanqulov, kartına rejısseri Talǵat Jánibekov, «Qazaqfılm» top-menedjeri Gaýhar Ysqaqova, fılmniń atqarýshy prodıýseri Natalıa ıÝdına,
kartına redaktory Ǵızat Sultanov, túsirilim tobynyń dırektory Marlen Ábishev, JShS ókili Danııar Ábdiqadyrov, jeke kásipker Ilıa Korobeınıkov jáne kartınanyń ekinshi rejısseri Bıjan Ábishev.
Gaýhar Ysqaqovanyń advokaty onyń densaýlyǵyna baılanysty kepilge jiberý nemese úıqamaqqa alý týraly ótinish bergen, sot onyń ótinishin qanaǵattandyrmady. Sottyń paıymynsha, bultartpaý sharasyn ógertýge esh negiz joq.
Atap óteıik, budan buryn qorǵaýshylar Ysqaqovany bosatý týraly ótinish bergen, alaıda sot ony qanaǵattandyrmaı, abaqtyda ustaý merzimin uzartqan bolatyn.
Eske salsaq, sybaılas jemqorlyqqa qarsy ulttyq bıýro «Fenıks». fılmin túsirýge arnalǵan bıýdjet qarajatyn qymqyrǵanyn anyqtaǵan. Tergeý barysynda anyqtalǵandaı, «Qazaqfılm» «Fenıks» fılminiń bastapqy túsirilimi, daıyndyq kezeńine T.K.TURAN UNIVERSAL BUSINESS JShS-ǵa 79 mln teńge aýdarǵan.
Kúdikti retinde Qazaqstannyń halyq ártisi Tuńǵyshbaı Jamanqulov ustaldy, keıin ol óz kinásin moıyndap, kepilge bosatyldy. Jeltoqsan sońynda ýaqytsha ustaý oqshaýlaǵyshyna kartına rejısseri Talǵat Jánibekov qamalǵan.
Budan buryn, Tuńǵyshbaı Jamanqulov 5,3 mln teńgeniń ornyn toltyrǵany habarlanǵan edi.
