Jamanqulov isi: «Fenıkstiń» qarjysynyń 1,5 mln. teńgesi Jamanqulovtyń jeke júrgizýshisiniń jalaqysyna jumsalǵan
«Fenıks» kınofılmin túsirýge bólingen qarajatty rejısser Tuńǵyshbaı Jamanqulov óz júrgizýshisiniń jalaqysyna jumsaǵan. Al, júrgizýshisi bastyǵynyń balalaryn mektepke, sporttyq sektsııalarǵa aparyp otyrǵan. Bul týraly Almaty qalasyndaǵy №2 Medeý aýdandyq sotynda jalǵasqan otyrysta sotqa túsinik bergen kýáger Azamat Dúısenbaev málimdedi, dep habarlaıdy BAQ.kz tilshisi.
«Maǵan Nýrık esimdi tanysym habarlasyp, júrgizýshi retinde jumysqa turýǵa múmkindik baryn aıtty. Odan keıin, maǵan Natalıa ıÝdına («Fenıks» kınofılminiń atqarýshy prodıýseri - avtor.) telefon shalyp, Tuńǵyshbaı Jamanqulovtyń nómirin berdi. Men Tuńǵyshbaı Qadyrulymen habarlasyp, 2014 jyldyń mamyr aıynda jumysqa qabyldandym. Tuńǵyshbaı Jamanqulovtyń balalaryn ózimniń jeke avtokóligimmen tasydym»,- dedi sottaǵy sózinde kýáger.
Azamat Dúısenbaev kún saıyn T. Jamanqulovtyń balalaryn mektepke, al kanıkýl kezinde ártúrli sporttyq sekııalarǵa aparyp turǵanyn áńgimeledi. Aıtarlyǵy, aı saıyn onyń kartochkasyna 150 myń teńge jalaqy túsip otyrǵan. «Fenıks» kınofılmin qaıda jáne qalaı túsirgeninen habarsyzbyn. Men tek aptasyna úsh ret esepshini quzyrly mekemelerge aparyp otyrdym. Odan soń balalardy tasydym»,- dedi kýáger sottaǵy sózinde.
Qysqasha aıtqanda, T. Jamanqulovtyń júrgizýshisi «Fenıkske» qatysty óziniń mindetterin oryndamasa da, oǵan fılmniń bıýdjetinen jalaqy tólengen. Aıta keterligi, Tuńǵyshbaı Jamanqulov óz balalaryn tasyǵan júrgizýshisine 250 myń teńge qaryzyn qaıtarmaǵan.
Sot otyrysynda túsinik bergen bir kýáger, «Fenıks» kınofılminiń rejısseri Talǵat Jánibekovke jekemenshik páterin jalǵa bergen Álıma Muhametqalıeva T. Jánibekovtiń áıelinen aı saıyn 115 myń teńge alǵanyn ashyq aıtty. Ol páterin birneshe aıǵa jalǵa bergen. Alaıda, bul qarym-qatynastar zańdyq turǵydan rettelmegen. Túptep kelgende, páter jaldaýǵa az aqsha jumsalǵanymen, kartınaǵa bólingen 1 mln. 200 myń teńge urlanǵan. Aıtarlyǵy, oǵan eshqandaı zańdyq qujattar jasalmapty.
Aıyptaý aktisinde jarııa bolǵanyndaı, «Fenıks» kınofılmin túsirý barysynda páter jaldaýǵa eshqandaı qarajat bólý qarastyrylmaǵan. Soǵan qaramastan, Talǵat Jánibekov páterdiń jaldaýyna zańsyz qujattardy tirkepti. Osylaısha, atyshýly kınokartınany túsirýge bólingen qarajattyń 1 mln. 200 myń teńgesi jymqyrylǵan. Ótken jolǵy sot otyrysynda Tuńǵyshbaı Jamanqulovtyń «Fenıksti» túsirýge bólingen bıýdjettiń qarajatyn óz uıaly telefonynyń aqysy men úıin kúzetýge jumsaǵany málim bolǵan edi.
Aıta ketelik, tergeý barysynda Tuńǵyshbaı Jamanqulov óziniń qorǵaýshysynyń kózinshe bıýdjet qarajatyn urlaǵanyn tolyq moıyndady. Sondaı-aq, jymqyrylǵan aqshany qolma-qol aqshaǵa aınaldyryp, óziniń jeke qajettilikterin qanaǵattandyrýǵa jumsalǵanyn aıtty. Tergeý nátıjesinde belgili bolǵany, «Fenıks» kınofılminiń alǵashqy jáne daıyndyq kezeńderiniń óndirisine dep «T.K. Turan Universal Business» JShS-ine 79 mln. teńge aýdarady. Sonyń ishindegi 69 mln. teńgesin joǵaryda aty atalǵan kompanııa arqyly kınokartınanyń bas prodıýseri Tuńǵyshbaı Jamanqulov urlaǵan. Atalǵan kompanııanyń quryltaıshysy da - T. Jamanqulov. Aqsha qosalqy merdigerlik uıymdar arqyly qolma-qol aqshaǵa aınaldyrylyp, keıinirek T. Jamanqulovqa jetkizilgen.
