Jaman nársemen kúresýdiń jaqsy joly — jaqsylyqty kóbeıtý
ASTANA. KAZINFORM — Qoǵamda áleýmettik jeli arqyly ádepke jat áreketterdi kórsetý, balaǵat sóz aıtý, orynsyz qylyqtarmen kópshiliktiń nazaryn aýdarýǵa umtylý beleń alyp barady. Mundaı áreketter úshin aıyppul salynyp, ákimshilik qamaýǵa alynǵandar da bar. Bul qanshalyqty tıimdi jáne atalǵan úrdisti qalaı toqtatýǵa bolady? Osyǵan baılanysty ımam Nurlan Baıjigituly «BIZDIN ORTA» podkastynda pikir bildirdi.
Onyń aıtýynsha, qoǵamdaǵy tártipti qalyptastyrý úshin zań talaptarynyń oryndalýyn qamtamasyz etetin tetikter qajet.
— Memleketimizdi «shtrafstan» dep synaıtyndar bar. Biraq biz muny jasamasaq, halyqty qalaı tárbıeleımiz? Ońtústik Koreıaǵa bardyq. Ol jaqta aıaǵyńdy artyq qoıyp qoısań, aıyppul tóleısiń. Keıde halyqty tárbıeleıtin osyndaı tetikter bolýy kerek, — dedi Nurlan Baıjigituly.
Imam qoǵamdyq oryndardaǵy tazalyq máselesin mysalǵa keltirip, keıbir qarapaıym erejelerdiń zańmen bekitilýine qoǵamdaǵy tártiptiń tómendeýi sebep bolǵanyn aıtty.
— Mysaly, qoqysty úıiniń aldyna shyǵaryp qoıatyn jaǵdaılar bar. Kóringen jerge túkirmeý týraly zań shyǵarýǵa týra keldi. Nege? Óıtkeni sondaı jaǵdaıǵa jettik. Buryn adamdarda ar, namys, uıat, Qudaıdan qorqý, úlkendi qurmetteý sııaqty qaǵıdalar boldy. Sondyqtan kóp nárseni zańsyz-aq retteıtin, — dedi ol.
Nurlan Baıjigituly qazirgi qoǵamda kamera men aıyppul sııaqty baqylaý tetikteriniń qajettiligine de toqtaldy.
— Joldaǵy jyldamdyqty alaıyq. Belgide 60 shaqyrym dep tursa da, keıbir adam 160-pen júredi. Belgige qaramaıdy. Kamera qoıyp, birneshe ret aıyppul tólegennen keıin ǵana toqtaıdy. Sondyqtan keı jaǵdaıda kamera arqyly tártipke keltirýge týra keledi. Basqa amal qalmaıdy, — dedi ımam.
Onyń aıtýynsha, zań talaptaryn oryndaýdy syrtqy baqylaý arqyly ǵana emes, adamnyń ishki jaýapkershiligi arqyly qalyptastyrý mańyzdy.
— Qudaıdyń kamerasy bar dep úırete almaı jatqan joqpyz ba? Eger Qudaıdyń kamerasyn adamnyń júregine jetkize almaı jatsaq, onda memlekettiń kamerasy paıda bersin. Kamera degenniń ózi — zańnyń oryndalýyn baqylaý quraly, — dedi Nurlan Baıjigituly.
Imam áleýmettik jelidegi teris kontenttiń jas urpaqqa áserine de nazar aýdardy. Onyń pikirinshe, úlkenderdiń áreketi keıingi býynǵa úlgi bolyp, jaǵymsyz ádetterdiń tez taralýyna sebep bolýy múmkin.
— Árıne, jaman mysal tez juǵady, tez taraıdy. Biraq jalpy tilimizdiń shubarlanýyna, qoǵamdaǵy til mádenıetiniń buzylýyna osyndaı dúnıeler sebep bolady. Mysaly, sheteldik fılmderden bir-eki balaǵat sóz ortamyzǵa kirip ketti. Qazir jastarymyz sol sózderdi sóz tirkesi retinde qoldanyp júr. Bul durys emes, — dedi ol.
Sonymen qatar Nurlan Baıjigituly qoǵamdaǵy keleńsiz qubylystarmen kúreste tek jazalaý sharalaryna súıený jetkiliksiz ekenin atap ótti.
— Jaman nársemen kúresýdiń jaqsy joly — jaqsylyqty kóbeıtý. Biz ustaı berip, qamaı berip, bárin talqandaı bergennen qoǵamdy túzep bitpeımiz. Biz jaqsylyqtyń jarshysy bolýymyz kerek. Sonda jamanshylyqtyń ózi túbinde azaıady, — dep túıindedi ımam.
Aıta keteıik, kameraldyq baqylaý júrgizý qaǵıdalary ózgerdi.
