Jaman ádetten aryltatyn bilezik
ASTANA. QazAqparat - AQSh ǵalymdary jaman ádetterden arylýǵa kómektesetin bilezik oılap tapty, dep jazady 24.kz.
Bir qyzyǵy, Pavlok atty qurylǵynyń ıesi baptaýlaryn óz yńǵaıyna qaraı rettep ala alady. Eger ol ádettegideı temeki tartyp, jeýge bolmaıtyn taǵamǵa qolyn sozsa, bilezikten toq urady eken.
Djastýs Ipen kúnde keshkisin jumystan keıin syra ishýge qumar bolǵan. Munyń arty jaqsylyqqa ákelmesin túsingen ol osy ádetinen arylýǵa bel býyp, atalmysh bilezikti satyp alady. Djastýs óz-ózine bergen ýádesin buza qalsa, bilezik toqpen uryp, sazaıyn tartqyzady eken.
- Qatarynan 5 kún boıy bokalymdy syraǵa toltyrǵan boıda, toqqa soǵyldym. Sodan keıin syrany almaıtyn bolyp kettim, - deıdi ol.
Qolǵabys quraldy oılap tapqandardyń aıtýynsha, bilezik adamdy toqpen urǵan kezde, mıdaǵy jaman ádetti qalyptastyratyn neırondar bir-birinen ajyraıdy eken. Pavlok-tiń paıdasy arta túsýi úshin ónertapqyshtar dene jattyǵýlaryn ne bolmasa medıtatsııa sııaqty jaqsy ádetterge daǵdylanýǵa keńes beredi.
