Jamalıev túrmede VIP kamerada otyrǵan joq
ASTANA. QazAqparat - Qaırat Jamalıev túrmede VIP kamerada otyrǵan joq, «barak» úlgisindegi otrıadta jazasyn óteýde. Bul jaıynda QazAqparatqa QR Іshki ister mınıstrligi Memlekettik til jáne aqparat departamentiniń dırektory Almas Sadýbaev málim etti.
«Almaty oblysynyń prokýratýrasy «Vremıa» gazetinde kórsetilgen derekterdi tekserý maqsatynda osy jyldyń 31 tamyzy kúni túngi saǵat 00-25-te mekeme aýmaǵynda artyqshylyq jaǵdaı jasalǵan kameralardyń bar-joǵyn anyqtaý úshin vıdeotaspaǵa túsire otyryp, tosynnan tekserý júrgizdi. Tekserý nátıjesinde gazet maqalasynda kórsetilgen VIP-kameralar týraly málimet rastalmady. Munan ary sottalǵan Q.Jamalıevtiń otrıad jataqhanasynda turatyndyǵy tekserildi. Sottalýshy jazasyn «barak» úlgisindegi otrıadta óteýde, onda sottalýshylar ortaq jatyn sektsııada ustalady», - dedi ol.
Onyń aıtýynsha, Іshki ister mınıstrliginiń Ózindik qaýipsizdik departamenti N.Altynhanovtyń Almaty oblystyq qylmystyq atqarý júıesi departamenti bastyǵynyń orynbasary B.Júnisov pen LA-155/14 mekemesiniń bastyǵy B.Sháripbekovke qatysty shaǵymyna baılanysty tekserý júrgizýde. Ol aıaqtalýǵa jaqyn.
«Munan bólek, laýazymdy tulǵalar tarapynan jibergen zańbuzýshylyqtar tártiptik komıssııada qaralady. Kinálilerge tártiptik jazanyń eń qatań sharalary qabyldanatyn bolady. Tipti, olar qyzmetten de bosatylýy múmkin», - dedi Almas Sadýbaev.
