Jalynmen kúresip júrgenine 20 jyldan asqan óskemendik: Bizdiń jumysta batyldyq kerek
«Eńbek jolymdy 2000 jyly órt sóndirýshi-qutqarýshy bolyp bastadym. Kóp jyldar boıy qalanyń eń jaýynger bólimi sanalatyn №7 órt sóndirý bóliminde jumys istedim. Barlyǵy qansha órt sóndirgenim naqty esimde joq. Áıteýir, óte kóp boldy. Adam ómirin de az qutqarmappyz. 2011 jyly bolǵan elevatordaǵy kúrdeli órt áli esimde, transporter lentasy men býnker janyp jatty. Oqıǵa ornyna birinshi bolyp kelip, barlaý jasadyq. Órttiń qatty bolǵany sonsha, kúıip te qaldym. Biraq, bári sátti aıaqtaldy. Jalyn da sóndirildi. Al, 2015 jyly Vınogradov kóshesindegi jataqhanada bólme otqa orandy. Іshke kirip, bir adamdy alyp shyqtyq», - deıdi Aıan Qyzyrbekov.
Onyń aıtýynsha, órt sóndirýshi bolý úshin eń birinshi batyldyq, basqalarǵa kómektesý nıeti bolý kerek.
«Órt sóndirýge eń kóp degende bir táýlikte 10 retten astam ret attandyq. Bul negizinen kóktem men jaz kezderinde. Bizdiń qoldanatyn jabdyqtardyń salmaǵy jeńil emes. Máselen, 9-qabatta órt shyqsa, osy jabdyqtardyń barlyǵyn alyp, baspaldaqpen kóterilemiz. Árıne, óte aýyr. Sondyqtan, fızıkalyq jattyǵýlar jasap, únemi daıyn júrýimiz kerek. Órt sóndirý bólimsheleriniń esebinde turǵan tehnıkalyq jabdyqtar únemi profılaktıkalyq tekserýden ótedi. Tipti, tıtteı aqaýlardy birden joıý qajet, óıtkeni adam ómiri osyǵan baılanysty», - deıdi tájirıbeli órt sóndirýshi.
Aıan Qyzyrbekov jumystan bos ýaqytta balyq aýlaǵandy jaqsy kóredi. Sportpen shuǵyldanyp, fýtbol oınaıdy. Áıeli men eki balasyna kóbirek ýaqyt bólýge tyrysady.
«Órt sóndirýshi, eń áýeli óz jumysyn jaqsy kórýi tıis. Odan soń tózimdilik pen eńbekqorlyq tanytý qajet. Órt sóndirýshilerdi Kókshetaý qalasynda ornalasqan M. Ǵabdýllın atyndaǵy azamattyq qorǵaý akademııasynda daıyndaıdy. Ony aıaqtaǵannan keıin azamattyq qorǵaý leıtenanty bolasyz. Qatarymyzǵa qosylǵysy keletinder bolsa, marhabat!» - deıdi A. Qyzyrbekov.
Foto: keıipkerdiń jeke muraǵatynan