Jalpyulttyq telekópir: Elbasyna avtojol qurylysy jobalary týraly aıtyldy
«2018 jyldyń mamyr aıynda Úlken Almaty aınalma avtokólik jolynyń qurylysy bastaldy. Bul joba - ozyq tehnologııalardyń kómegimen salynatyn zamanaýı kólik jol aıryqtary, estakadalar men jol ótpeleri bar 6 jolaqty 66 shaqyrymdyq jol. Qurylys barysynda 3 myńǵa jýyq jumys orny ashylyp, 150 mıllıard teńgeden astam tikeleı ınvestıtsııa tartylmaq. Joba iske qosylǵan soń, táýligine 38 myń avtokólik Almatyny aınalyp ótetin bolady. Al bul óz kezeginde Qytaı men Eýropa arasyndaǵy júk tasymalyn 3,5 mln tonnaǵa ulǵaıtýǵa múmkindik beredi. Aınalma jol qalany uzyn-sonar kólik keptelisinen qutqaryp, qala ekologııasyna jaǵymdy áserin tıgizbek», - dedi QR Investıtsııalar jáne damý birinshi vıtse-mınıstri Roman Sklıar.
Sonymen qatar «QazAvtoJol» UK» AQ Basqarma tóraǵasy Ermek Qızatov Reseı men Shyǵys Eýropaǵa shyǵýǵa múmkindik beretin jol boıynsha esep berdi.
«Nurly jol» memlekettik baǵdarlamasyn iske asyrý boıynsha «Oral-Tasqala» avtomobıl jolyn qaıta jańǵyrtý jumystary aıaqtaldy. Eki jyldyń ishinde ózge salalardan 1,5 myńnan asa maman jumysqa tartylyp, 100 shaqyrym jol jańartyldy. Aldaǵy ýaqytta jol bóliginiń ótkizgishtigi eki myńnan jeti myńǵa deıin kóteriletin bolady. Sonymen qatar, Qazaqstan-Reseı shekaralyq beketiniń kólikterdi ótkizý qabileti 2 esege artady. Osy jol «Batys Eýropa-Batys Qytaı» halyqaralyq kólik dálizindegi tranzıttiń ósýine múmkindik beredi. Qurmetti Nursultan Ábishuly, Oral-Tasqala tas joly iske qosylýǵa daıyn. Qozǵalysty bastaýǵa ruqsat suraımyz!», - dedi E. Qızatov.
Memleket basshysy Nursultan Nazarbaev jalpy jol salý úlken jumystardy qajet etetinin, aldaǵy ýaqytta da avtokólik joldary men ózge de baılanys jelileri qurylysyna erekshe mán beriletinin atap ótti.
