Jalpyulttyq referendým memleket pen búkil qoǵamnyń bolashaǵyn aıqyndaıtyn jaýapty sát - Prezıdent
«Qazaqstan óte mańyzdy ári betburysty kezeńge qadam basqaly tur. 5 maýsym kúni azamattarymyz jalpyulttyq referendýmda daýys beredi. Konstıtýtsııaǵa túzetýler engizý máselesi boıynsha sheshim qabyldaıdy. Bul – memlekettiń jáne búkil qoǵamnyń bolashaǵyn aıqyndaıtyn jaýapty sát. El taǵdyry eshkimdi beı-jaı qaldyrmaıtyny anyq. Biz qazir barlyq salany jańǵyrtýǵa kiristik. Osy jolda memleketti basqarý úlgisin túbegeıli ózgertý qajettigi týyndady. Sol sebepti, men naýryz aıyndaǵy Joldaýymda saıası jańǵyrýdyń aýqymdy baǵdarlamasyn usyndym. Onyń basty maqsaty – elimizdi odan ári demokratııalandyrý, halyqtyń memleketti basqarý isine qatysý múmkindigin keńeıtý, sondaı-aq, Úkimettiń tıimdiligin arttyrý», - dedi Memleket basshysy respýblıkalyq telearnalar arqyly el halqyna joldaǵan úndeýinde.
Prezıdenttiń atap ótýinshe, bul ózgeristi tolyq júzege asyrsaq, yqpaldy parlamenti bar prezıdenttik respýblıka úlgisine birjola kóshemiz.
«Konstıtýtsııalyq reforma adam quqyqtary men bostandyqtaryn qorǵaý júıesin barynsha kúsheıtedi. Sonymen birge elimizdegi saıası básekeniń ádil jáne ashyq bolýyn qamtamasyz etedi. Biz Ata zańymyzdyń otyzdan astam babyna ózgeris engizgeli otyrmyz. Onyń bári azamattarymyzdyń múddesine tolyq saı keledi. Osylaısha, memleketimizdi túbegeıli jańǵyrtamyz. Sol arqyly Ekinshi Respýblıkanyń negizin qalaımyz», - dedi Qasym-Jomart Toqaev.
