«Jalpyulttyq «Qazaq» gazetine júz jyl tolady» - BAQ-qa sholý

ASTANA. 30 qańtar. QazAqparat - «QazAqparat» agenttigi respýblıkalyq basylymdarda 30 qańtar, sársenbi kúni shyqqan ózekti materıaldarǵa sholýdy usynady.

***

«Egemen Qazaqstan» basylymynyń jazýynsha, keshe Premer-Mınıstr Serik Ahmetov Qaraǵandy oblysynda bolyp, óńirdiń jańa basshysyn tanystyrdy. Qaraǵandyda Premer-Mı­­nıstr S.N.Ahmetov pen Pre­zı­dent Ákimshiliginiń Basshysy K.Q.Másimov ob­lys­tyq máslıhat­tyń kezekten tys sessııasyna­ qatysyp, on­da S.Ahmetov Memle­ket basshysynyń Baýyr­jan Ábdishevtiń kandıdatýrasyn oblys ákiminiń laýazymyna usyný týraly hatyn depýtattarǵa oqyp berdi. Depýtattar Prezıdent usynǵan kandıdatqa biraýyzdan qoldaý kórsetti. Sessııa aıaqtalǵan soń S.Ahme­tov oblys aktıvine óńirge jańa bas­shyny tanystyrdy. «Jańa ákimniń aldyna eleýli mindetter qoıylyp otyr. Memleket basshysy Qaraǵandy oblysyn damytýǵa aıryqsha kóńil bóledi. B.Ábdishevtiń Prezıdenttiń joǵary senimin aqtaıtynyna senimim mol», - dedi S.Ahmetov.

«Tabıǵattyń tylsym kúshine tań qalmasqa sharań joq. Ońtústiktiń teriskeıinde bolǵan dúleı daýyl áli talaı áńgimege tamyzyq bolatyn shyǵar. Qaıbir kúni Sholaqqorǵanda bolǵanymyzda aýyl qarııalary «osynshama jasqa kelgenimizde mundaı dúleı daýyldy birinshi márte kórip otyrmyz, áıteýir, qudaı aqyryn bersin», dep ózderi de ań-tań bolyp otyr. Iá, qansha Ońtústik desek te, Sozaq jeri baıaǵydan-aq tabıǵatynyń qataldyǵymen erekshelenetin. Biraq, bul jolǵysy tym tosyn boldy. Daýyldan eń kóp zardap shekken eldi meken - Taýkent. Biraq, jel jaq betin qart Qarataý orap, ózi shuńqyrdyń ishinde, yqta jatqan bul kentti áp-sátte opaı-topaı qylǵanyna taǵy da tań qalasyń. 5 myńǵa tarta turǵyny bar shaǵyn kentte daýyldan aman qalǵan úı joq. Jeldiń ekpininiń qattylyǵy sonshalyq, aýyr júk kólikteriniń ózin aýdaryp tastaǵan. Biz Taýkentke barǵanda qıraǵan úılerdi jóndeýdiń sońǵy jumystary júrip jatyr eken»,-dep jazady «Egemen Qazaqstan» gazeti búgingi sanynda. Bul maqala «Barlyq jumys bereke-birliktiń arqasynda bitti» degen taqyryppen jarııalandy.

***

«Aıqyn» gazetiniń jazýynsha, aqpan aıynyń 2-kúni Ahmet Baıtursynovtyń bas bolýymen alash arystary dúnıege ákelgen Jalpyulttyq «Qazaq» gazetine júz jyl tolady. Ulttyq sananyń uıytqysy bola bilgen basylymnyń bir ǵasyrlyq mereıtoıy eleýsiz, eskerýsiz qalmaýy kerek. Osyny oılaǵan «Amanat» ıntellektýaldy pikirsaıys klýby alashtanýshy ǵalymdar men aqyn-jazýshylarǵa jáne saıasatkerlerge minber usynyp, sóz berdi. «Qazaq» gazetiniń shyǵý tarıhy, qazirgi jýrnalıstıkanyń ózekti máseleleri jáne Alash arystarynyń ustanymdary men ıdeıalarynyń búgingi kúnmen sabaqtastyǵy týraly taqyryptar talqy tarazysyna túsken jıynda «Nur Otan» partııasynyń hatshysy Erlan Qarın alǵashqylardyń biri bolyp pikir bildirdi. Ol osydan júz jyl buryn qazaq baspasózinde jarııalan­ǵan maqalalar kúni búginge deıin ózektiligi men mańyzdylyǵyn joımaǵanyn jetkizip, sol kezde jaryq kórgen gazetter qalǵyǵan eldiń ulttyq rýhyn oıatýǵa talpynǵanyn túsindirdi. Budan keıin partııa hatshysy áńgime aýanyn qazirgi qazaq jýrnalıstı­ka­syna buryp bylaı dedi: «Qazirgi qazaq baspasózi Qazaqstan táýelsizdik alǵan kúnnen bastap ulttyq qozǵalystyń, ult­tyq partııanyń qyzmetin atqaryp keledi. Til, din, dil, jer máselelerin kóterýde de qazaq baspasózi men qazaq tildi jýrna­lıs­ter aldaryna qara saldyrmaı otyr». Bul maqala «Ulttyń rýhyn kótergen basylym» degen taqyryppen berilip otyr.

Osy basylymda «Jaǵymsyz jarnama: kelmeske ketken qyzyl ásker kúnin qashanǵy toılaımyz?» atty maqala kópshilik nazaryna usynylyp otyr. Qańtar aıy qańtarylyp, aqpan esigin ashqan mezgilden bastap kommertsııalyq jarnamalardyń kúni týady. Mysaly, apta basynda «Almaly» saýda ortalyǵy taratqan orys tilindegi jarnama paraqshalary kelip tústi: Syrtqy bezendirilýi jáne qaǵaz­dyń sapasy jaǵynan min joq. Olar 1-14 aqpan aralyǵynda «Almaly» saýda ortalyǵynda bir-birine ǵashyq boıjetken men bozbalanyń sýreti arnaıy beınekórinistermen bezendirilip berilse, 23 aqpan - Otan qorǵaý kúnine jastardy merekelik toı-dýmanǵa shaqyrady. Bul kún Reseıde resmı mereke retinde atap ótiledi. «Ras, bizdiń eldiń qyzyl árippen belgilengen me­rekeler tiziminde 17 qazan da, 14 aqpan da, 23 aqpan da joq. Biraq toılanady. 23 aqpandy Otan qorǵaýshylar kúni dep toılaýǵa daıyn­dalyp jatqandaryn qyp-qyzyl jarnamasy arqyly dúıim jurtty toı-dýmanǵa shaqyryp jatyr. Joǵary­da keltirilgen kúnder qur­metine oraılastyrylǵan merekege «Almaly» saýda ortalyǵy ǵana emes, 17 klýb qyzý daıyndaq ústinde. Aldy elimizden taraıtyn kommertsııalyq telearna­lar arqyly da, túrli-tús­ti býkletter arqyly da jar­namasyn kelistirip ja­tyr. Bári - orys tilinde. Sebebi resmı tilde berilgen jarnamanyń ýyty jastar arasynda ótimdirik. Biz mu­ny atalmysh saýda ortalyǵy­nyń jarnama menedjeri Vık­tor Halmuradovtan esittik. «Osydan 21 jyl buryn kelmeske ketken Qyzyl ás­ker kúniniń búginge deıin toılanyp kele jatqanyna ne sebep?» degen saýaly­myz­ǵa «23 aqpan este joq zamannan beri toılanyp kele ja­tyr. Jáne jyl saıyn jas­tar kóp jınalady. Al 14 aqpan jastar júregin jal­ǵastyratyn kúnge aınaldy. Jastar 14 aqpan kúni neke­sin qııý úshin alty aı bu­ryn ótinish berip qoıady. Bul - bizdiń eldiń jastary úshin qalyptasyp qalǵan dás­túr» degen jaýap aldyq»,-dep jazady gazet tilshisi.

***

«Alash aınasy» gazetinde «Qyzdarymyz qylyqty emes, bylyqty bolyp bara ma?» degen maqala jaryq kórdi. «Besikten beli shyqpaı jatyp, mektep qabyrǵasynda júrip-aq Іshki ister basqarmasyna qarasty Kámeletke tolmaǵandar isi jónindegi bólimniń esebinde turatyn jasóspirimder máselesi alańdatarlyq. Óıtkeni mektep ınspektorlary «mektep qabyrǵasynda júrgen olardy túzý jolǵa salmasaq, erteńgi kúni túrme balasyna aınalýy ońaı» deıdi. Al mundaı tizimge qyz balalar kóptep ilinip jatsa, bul - tipti alańdatarlyq jaǵdaı», dep jazady basylym.