Jalpyqalalyq senbilikte elordadan 1 myń tonnadan astam qoqys shyǵaryldy
ASTANA. QazAqparat - Búgin Astanada jalpyqalalyq senbilik ótti. Oǵan qalanyń 62 myńnan astam turǵyny, eńbek ujymdary, memlekettik organ qyzmetkerleri men bıznes ókilderi qatysty, dep habarlaıdy QazAqparat tilshisi.
«Jasyl Astana» ekologııalyq aılyǵy aıasynda ótip jatqan senbilikke qatysqan qala turǵyndary búkil kireberister men óz aýlalarynyń tazalyǵyna atsalysty.
«Búgin sómkemizdi arqalap, qolǵaptarymyzdy kıip, qolymyzǵa kúrek alyp, jalpy senbilikke shyqtyq. Tipti balalar da bizben birge qoqys jınady. Aǵashtardyń túbi áktelip, retke keltirildi. Tazalyqtyń ornaǵanyna qýanyp otyrmyz. Ári mundaı is-sharalar kórshilerdi bir birimen jaqyndastyra túsedi», - deıdi elorda turǵyny Baqyt Quspetova.
Merdigerlik uıymdar shaǵyn sáýlet nysandaryn, eskertkishter men músinderdi, qoqys alańdary men konteınerlerdi jýý jáne qalpyna keltirý jumysyn júrgizdi.
Senbilik kezinde 5 aýdannyń árqaısysyna aǵashtar men butalar egildi. Onyń ishinde japyraqty aǵashtarǵa basymdyq berildi.
Elorda boıynsha barlyǵy 8 myńǵa jýyq jasyl jelek otyrǵyzyldy.
«Ekologııalyq aılyq aıasynda aýdanymyzda senbilikter únemi ótkizilip turady. Onyń barysynda jasyl jelekter otyrǵyzylady. Qala turǵyndaryn senbilikterge belsendi qatysýǵa shaqyramyz. Al óz tarapymyzdan qajetti qural-jabdyqtarmen qamtamasyz etemiz. Eń bastysy - jaqsy kóńil-kúımen kelip, aýdandy kógaldandyrýǵa úles qosýy kerek», - deıdi Almaty aýdany ákiminiń orynbasary Muhamedııar Qojekenov.
Senbilik barysynda Prezıdent saıabaǵynda aǵash otyrǵyzýǵa túrli uıymdar men kásiporyndardyń ókilderi qatysty.
Olardyń arasynda dıplomatııalyq korpýs, Qarjy mınıstrliginiń qazynashylyq komıteti, «Qazaqstandyq standarttaý jáne metrologııa ınstıtýty», «Qazaq Air» AQ, Ardagerler keńesi jáne basqalar bar.
Ulybrıtanııanyń Qazaqstandaǵy elshisi Ketı Lıch te búgin senbilikke shyqty.
«Bárimiz Astananyń jasyl qalaǵa aınalǵanyn qalaımyz. Osyǵan atsalysyp, aǵash otyrǵyzǵanyma qýanyshtymyn», - dep atap ótti Ketı Lıch.
Senbilik barysynda elorda 1 myń tonnadan astam qoqys jınalyp, shyǵaryldy. Qalanyń 3,3 mln sharshy metrden astam jeri tazartyldy.
