Jalpyǵa birdeı deklaratsııany 497 myń adam tapsyrdy, 99,9% elektrondy formatta

NUR-SULTAN. QazAqparat – Jalpyǵa birdeı deklaratsııalaýdyń birinshi kezeńinde 497 myń adam deklaratsııa tapsyrdy, onyń 99,9% elektrondy túrde usynylǵan. Bul týraly QR Qarjy mınıstrligi Memlekettik kirister komıteti tóraǵasynyń orynbasary Jaıdar Іńkárbaev aıtyp berdi, dep habarlaıdy QazAqparat.

«Elbasy Nursultan Nazarbaevtyń Bes ınstıtýtsıonaldyq reformany iske asyrý jónindegi 100 naqty qadam – Ult josparynyń 42-qadamyn jáne QR Sybaılas jemqorlyqqa qarsy strategııasyn oryndaý úshin 2021 jylǵy 1 qańtardan bastap jalpyǵa birdeı deklaratsııalaý kezeń-kezeńimen engizilýde. Jeke tulǵalar birinshi jyly jınaqtalǵan aktıvterdi tirkeý úshin aktıvter men mindettemeler týraly «kiris» deklaratsııasyn tapsyrady, keıinnen negiz bolǵan jaǵdaıda jyl saıyn kiristeri men múlki týraly deklaratsııany usynyp otyrady», - dedi spıker Ortalyq kommýnıkatsııalar qyzmetinde ótken baspasóz máslıhatynda.

Memlekettik qyzmetshiler men olarǵa teńestirilgen adamdar jáne olardyń jubaılary ózderiniń jeke aktıvteri men mindettemelerin birinshi bolyp deklaratsııalaıdy, óıtkeni bul azamattardyń daıyndalǵan bóligi jáne bıyl olardyń 99 paıyzy elektrondy túrde deklaratsııa tapsyrǵan.

«Al 2023 jylǵy 1 qańtardan bastap memlekettik mekemeler men kvazımemlekettik sektor qyzmetkerleri jáne olardyń jubaılary aktıvteri men mindettemeleri týraly «kiris» deklaratsııasyn ekinshi kezeńde usynady.

2024 jyldyń 1 qańtarynan bastap – bıznes ókilderi, ıaǵnı zańdy tulǵalar men jeke kásipkerlerdiń basshylary, quryltaıshylary jubaılarymen birge deklaratsııa tapsyrýy qajet. Sońǵy kezeń – 2025 jyldyń 1 qańtarynan bastap qalǵan barlyq azamattarǵa deklaratsııalaýdan ótý mindetteledi», - dep túsindirdi J. Іńkárbaev.

Onyń aıtýynsha, jalpyǵa birdeı deklaratsııalaýǵa kóshý kóleńkeli aınalymdy, sybaılas jemqorlyq deńgeıin tómendetýge jáne memlekettik bıýdjetke qosymsha túsimderdi qamtamasyz etýge múmkindik beredi.

«Tabys etý merziminiń aıaqtalýyna qaraı, ıaǵnı 2021 jylǵy 15 qyrkúıekke qosa alǵanda, deklaratsııany 497 myń adam tabys etti. Qabyldanǵan 512 myń deklaratsııanyń ishinde eń kóp taralǵan ótinim berý tásili bolyp e-Salyq Azamat mobıldik qosymshasy tabylady, onyń kómegimen deklaratsııalardyń 54% usynylǵan. «Salyq tóleýshiniń kabıneti» arqyly – 40%, «Elektrondyq úkimet» portaly arqyly – 5% jáne qaǵaz tasyǵyshta 414 adam nemese jalpy sanynyń 0,1% deklaratsııa tapsyrdy», - dep habarlady J. Іńkárbaev.

Deklaratsııada 31 jeltoqsandaǵy jaǵdaı boıynsha qolda bar aktıvter men mindettemeler týraly málimetterdi kórsetý qajet, sonyń ishinde:

- shet memlekette tirkelgen ne tirkeýge jatatyn jyljymaıtyn múlik, kólik quraldary;

- Qazaqstan Respýblıkasynan tys jerlerdegi sheteldik bankterdegi banktik shottardaǵy 1000 eselengen Aılyq esepteme kórsetkishten asatyn qarajat;

- turǵyn úı qurylysyna úlestik qatysý týraly shart boıynsha somalar;

- Qazaqstan Respýblıkasynan tys jerde qurylǵan zańdy tulǵanyń jarǵylyq kapıtalyna qatysý úlesi;

- baǵaly qaǵazdar, týyndy qarjy quraldary;

- ınvestıtsııalyq altyn;

- zııatkerlik menshik, avtorlyq quqyq obektileri;

- 10 000 aılyq eseptik kórsetkish shegindegi somada kórsetiletin qolma-qol aqsha;

Aktıvter men mindettemeler týraly deklaratsııa turǵylyqty jeri boıynsha, ıaǵnı jeke tulǵa tirkelgen salyq organyna usynylady.

Deklaratsııany elektrondy túrde salyq tóleýshiniń kabıneti – Cabinet.salyk.kz, «Elektrondyq úkimet» portaly egov.kz arqyly, sondaı-aq e-Salyq Azamat jáne eGov mobile mobıldi qosymshalary arqyly tapsyrýǵa bolady.