Jalpyǵa birdeı deklaratsııalaý: Búgin deklaratsııany qaǵaz túrinde tapsyrý merzimi aıaqtalatyn kún

NUR-SULTAN. QazAqparat – Búgin, 2022 jylǵy 15 shildede, jeke tulǵalardyń kiristeri men múlki týraly deklaratsııany (270.00 nysan) qaǵaz túrinde tapsyrý merziminiń sońǵy kúni ekenin eske salamyz, - dep habarlady QR Qarjy mınıstrliginiń Memlekettik kirister komıteti.

Deklaratsııany jeke tulǵanyń turǵylyqty jeri boıynsha memlekettik kirister basqarmasyna tapsyrý qajet.

Eger qaǵaz túrinde tapsyrylmasa, 2022 jylǵy 15 qyrkúıekke deıin elektrondy túrde tapsyrýǵa bolady.

«Jalpyǵa birdeı deklaratsııalaýdyń birinshi kezeńinde, ıaǵnı byltyr, aktıvteri men mindettemeleri týraly deklaratsııany usynǵan tulǵalar 2022 jylǵy 1 qańtardan bastap kiristeri men múlki týraly deklaratsııany usyna bastaǵan. Ol azamattarǵa memlekettik qyzmetshiler, olarǵa teńestirilgender, bank jáne saqtandyrý naryǵynyń jáne baǵaly qaǵazdar naryǵynyń iri qatysýshylary, sondaı-aq atalǵan tulǵalardyń jubaılary jatady»,-delingen habarlamada.