Jalpy somasy 2 mlrd. 800 mln. teńge kólemindegi 19 000 ónim partııasyn satýǵa tyıym salyndy
ASTANA. 23 aqpan. QazAqparat /Aınur Kenebaeva/ - 2010 jyly júrgizilgen ár túrli tutyný sanatyna jatatyn ónim túrlerin tekserý barysynda belgilengen talaptar men sharttardyń saqtalmaıtyndyǵy jáne ónimderdiń standarttarǵa sáıkes kelmeıtindigi anyqtalǵan.
Zańmen belgilengen talaptardyń saqtalmaýy negizinen taýarlardy sertıfıkattaý, qoraptardy tańbalaý men qaýipsizdik kórsetkishterine qatysty bolyp otyr.
Bul jóninde búgin elordadaǵy baspasóz maslıhatynda Memlekettik baqylaý saraptamasy men monıtorıngi basqarmasynyń bastyǵy Ashat Hasenov málimdedi.
Tehnıkalyq retteý jáne metrologııa komıtetiniń mamandary júrgizgen tekserister men memlekettik baqylaýdyń qorytyndylaryna sáıkes talaptar men normalardy buzý boıynsha mańyzdy tutyný ónimderiniń túrli toptarynda mynadaı kórsetkishter tirkelgen: qurylys materıaldary - 56%, ónerkásip ónimi - 54%, halyqtyq tutyný taýarlary - 53%, elektrotehnıkalyq buıymdar - 52%, munaı ónimderi - 47%, dári-dármek- 42%.
Sertıfıkattaý, tańbalaý, qaýipsizdik talaptar men belgilengen tehnıkalyq reglamentter buzylǵan faktiler boıynsha jalpy somasy 2 mlrd. 800 mln. teńge kólemindegi 19 000 ónim partııasyn satýǵa tyıym salynǵan.
«Qaýipsizdik talaptarynyń buzylýy, sonyń ishinde tańbalaý erejesiniń durys saqtalmaýy men belgili bir tamaq ónimderiniń bakterologııalyq normalarǵa sáıkes kelmeý jaǵdaılary tamaq ónimderine qatysty bolǵan. Bundaı olqylyqtar Almaty, Batys Qazaqstan, Qostanaı oblystaryndaǵy ónimderdi tekserý barysynda anyqtalǵan», - dedi Ashat Hasenov.
