Jalpyulttyq sotsıal-demokratııalyq partııasy Quryltaı depýtattyǵyna 33 kandıdatty bekitti
ASTANA. KAZINFORM – Astanada Jalpyulttyq sotsıal-demokratııalyq partııanyń (JSDP) kezekten tys XXV sezi ótti. Jıynda partııanyń saılaýaldy baǵdarlamasy qabyldanyp, Quryltaı depýtattyǵyna usynylatyn 33 kandıdattyń tizimi bekitildi.
Partııa málimetinshe, Quryltaı depýtattyǵyna usynylǵan 33 kandıdattyń 23-i — er adam, 10-y — áıel. Kandıdattardyń eń úlkeni 1957 jyly, eń jasy 2000 jyly týǵan.
Sezde partııanyń «Progress jolyndaǵy 20 beles» atty saılaýaldy baǵdarlamasy da bekitildi. Baǵdarlama ataýy JSDP-nyń 2027 jyly 20 jyldyq mereıtoıyn atap ótýimen baılanysty. Qujatta partııa usynǵan reformalardyń 20 negizgi baǵyty qamtylǵan.
Baǵdarlama tórt negizgi baǵytty qamtıdy. JSDP tóraǵasy Ashat Raqymjanov jańa Konstıtýtsııa qabyldanǵannan keıin Qazaqstan saıası damýdyń jańa kezeńine ótkenin aıtty. Onyń sózinshe, Ata Zańda kórinis tapqan birqatar bastamany partııa uzaq jyldar boıy kóterip keledi.
— Jıyrma jyldyq tarıhynda JSDP óz baǵytyn ózgertken joq. Biz halyqpen birge bolatyn partııa bolyp qala beremiz. Saılaýaldy baǵdarlama demokratııalyq reformalarmen ǵana shektelmeıdi. Onda memleket basqarý júıesin, ekonomıkany jáne áleýmettik salany jańǵyrtýǵa arnalǵan naqty tetikter usynylǵan, — dedi ol.
Sezde áleýmettik saıasat máseleleri de qaraldy. Partııa ókilderi bilim berý, densaýlyq saqtaý jáne áleýmettik qorǵaýǵa bólinetin qarjyny bıýdjet shyǵyny retinde emes, adam kapıtaly men eldiń bolashaǵyna salynatyn ınvestıtsııa retinde qarastyrý qajet ekenin aıtty. Sondaı-aq zeınetke shyǵý jasyn qysqartý máselesin de kóterdi.
JSDP sondaı-aq ekonomıkany demonopolııalandyrýdy, otandyq óndiristi qoldaýdy, aýyl sharýashylyǵyn damytýdy, jer úlesi ıeleriniń quqyqtaryn qalpyna keltirýdi, jeke qosalqy sharýashylyqtardyń quqyqtyq mártebesin zańmen bekitýdi jáne tabıǵı resýrstardan túsetin tabysty ádil bólýdi qoldaıtynyn málimdedi.
Sezde saıası reformalardy jalǵastyrý máselesi de kóterildi. Qatysýshylar jańa Konstıtýtsııanyń qabyldanýy saıası jańǵyrý úderisiniń aıaqtalǵanyn bildirmeıtinin atap ótti. Partııa halyq bıligi ınstıtýttaryn damytýǵa, saıası básekelestikti qamtamasyz etýge, táýelsiz sot júıesin nyǵaıtýǵa, jergilikti ózin-ózi basqarýdy kúsheıtýge jáne azamattardyń konstıtýtsııalyq quqyqtarynyń oryndalýyna kepildik berýge basymdyq beretinin aıtty.
Sezd qorytyndysynda partııa saılaýaldy baǵdarlamasy men kandıdattar quramyn tanystyryp, Quryltaı depýtattaryn saılaý naýqanyna resmı túrde kiriskenin jarııalady.
Buǵan deıin Qazaqstan halyq partııasy Quryltaı depýtattyǵyna 72 kandıdatty bekitken bolatyn.
