Jalpyulttyq koalıtsııa qandaı baǵytta jumys isteıdi
ASTANA. KAZINFORM — «Ádiletti jáne Progressıvti Qazaqstannyń Halyqtyq Konstıtýtsııasy úshin!» atty Jalpyulttyq koalıtsııanyń qurylǵanyna bir apta boldy.
Onyń quramyna jetekshi saıası partııalardyń ókilderi, 300-ge jýyq qoǵamdyq uıym men 200-ge jýyq ár býynnyń, ár salanyń mamandary enip otyr. Ásirese Qazaqstannyń Azamattyq alıansy koalıtsııa aıasynda mańyzdy is-sharalar uıymdastyrady. Alıans dırektory Nuras Eraly Jibek Joly telearnasyna suhbat berip, koalıtsııa jumysy týraly aıtyp berdi.
Spıkerdiń aıtýynsha, Jalpyulttyq koalıtsııanyń negizgi baǵyttary – Konstıtýtsııadaǵy ózgeristerdiń mazmunyn halyqqa jetkizý jáne ashyq alań protsesin qalyptastyrý, tek aqparattandyrý emes, halyq arasynda keri baılanys mádenıetin qalyptastyrý.
Qazirgi ýaqytta barlyq aımaqta túsindirý jumystary júrip jatyr, árbir aýylda partııalardyń jastar qanaty jáne alıans ókilderi is-sharalar ótkizedi.
— Koalıtsııa aıasynda onlaın jáne offlaın myńdaǵan is-shara ótkizý josparlanǵan. Qazaqstannyń Azamattyq alıansy qazirdiń ózinde 20 aımaqtyń ókilderimen birlesip, otyzǵa jýyq is sharalar uıymdastyrdy. Ortalyq keńsede «Ustanym» ulttyq pikirtalas klýbynyń eki otyrystary ótti. Bul otyrystarǵa úkimettik emes uıymdar, jas kóshbasshylar men Májilis, Senat depýtattary kelip, oı-pikirlerin aıtty, — dedi Nuras Eraly.
Sonymen birge, alıans basshysy jurtshylyqpen kezdeskende qandaı suraqtar jıi qoıylatynyn aıtyp berdi.
— Kúndelikti qoıylatyn suraqtardyń biri — «Konstıtýtsııalyq ózgerister kúndelikti ómirimizge qandaı áser tıgizedi?» degen suraq. Odan bólek, ókiletti organdar qanshalyqty damıtyny, Konstıtýtsııalyq sot qyzmeti men qoǵamdyq baqylaý mehanızmderi qalaı ózgeredi degen suraqtar kelip túsken. Áleýmettik jelide koalıtsııa paraqshalaryna suraqtar qoıyp, jaýap alýǵa bolady, — dedi Nuras Eraly.
Sóz sońynda spıker jańa Konstıtýtsııanyń eń mańyzdy ári adam ómirine tikeleı áser etetin ózgeristeri jóninde baıandady.
— Birinshiden ókiletti organdardyń yqpaly artady. Birpalataly Quryltaı júıesi. Eń basty artyqshylyq sheshim qabyldaý jyldamdyǵy. Halyq Keńesi qurylady, eldegi eń joǵarǵy konsýltatıvti organ. Jergilikti aımaqtardyń máselesin kóterip, sheshýge kómektesedi. Uzaqmerzimdi perspektıvada qaraıtyn bolsaq, bul ózgerister Ádiletti Qazaqstan qaǵıdatyna sáıkes jańarý, — dedi ol.
Buǵan deıin referendýmdy daıyndaý jáne ótkizý kezeńinde qandaı úgitterge tyıym salynatynyn jazǵan bolatynbyz.
Eske sala ketsek, 2026 jylǵy 15 naýryzda jańa Konstıtýtsııany qabyldaý boıynsha respýblıkalyq referendým ótedi.