Jalpyǵa birdeı múmkindik beretin Ádiletti Qazaqstandy qurýǵa kiristik - Prezıdent
Qazaqstan uzaq merzimge arnalǵan ulttyq múddesine saı keletin salıqaly syrtqy saıasat júrgizip, halyqaralyq arenadaǵy bedelin arttyra tústi. Bul týraly Memleket basshysy Qasym-Jomart Toqaev jańajyldyq beınequttyqtaýynda aıtty, dep habarlaıdy Kazinform.
«Jumysshylardyń, ınjenerlerdiń jáne sharýalardyń eseli eńbegi, áskerıler men quqyq qorǵaý organdary qyzmetkerleriniń qasterli Otanymyzǵa qaltqysyz qyzmeti, kásipkerlerdiń tabysty jobalary, mádenıet qaıratkerleriniń shyǵarmashylyǵy jáne ǵalymdardyń elge paıdaly zertteýleri arqyly ultymyzdyń jasampazdyq áleýeti arta tústi. Óz kásibin minsiz atqaryp júrgen muǵalimder, medıtsına qyzmetkerleri jáne basqa da eńbek adamdary – búgingi kúnniń naǵyz batyrlary», - dedi Prezıdent óz quttyqtaýynda.
Prezıdent aıtqandaı, volonterler, metsenattar, qutqarýshylar jáne ózge de janashyr azamattar ıgi ister jasap, jankeshti erlik kórsetip, tilektestik pen qamqorlyqtyń ozyq úlgisin tanytty.
«Biz jańa qoǵamdyq etıkany qalyptastyrý, eńbekqorlyq pen bilimpazdyqty dáripteý jáne kreatıvti ekonomıkany damytý úshin kóptegen mańyzdy jumysty qolǵa aldyq. Elimizde kásibı sportpen qatar, buqaralyq sport qarqyndy damýda. Ásirese, balalar dene shynyqtyrýmen belsendi aınalysatyn boldy. Sol sebepti memleket aýyldyq jáne qalalyq jerlerde jańa sport nysandaryn salyp jatyr», - dedi Q. Toqaev.
Sondaı-aq, Qazaqstan uzaq merzimge arnalǵan ulttyq múddesine saı keletin salıqaly syrtqy saıasat júrgizip, halyqaralyq arenadaǵy bedelin arttyra tústi.
«Bir sózben aıtqanda, osy jyl bizdiń elimiz úshin mol tabysqa, jarqyn sátterge jáne mańyzdy oqıǵalarǵa toly boldy. Jalpy, ekonomıkamyz 4,9 paıyzǵa ósti. Tutas jurt bolyp kóptegen ózekti máseleni sheshe bastadyq. Osylaısha, elimizdiń damýyna tyń serpin berdik. Eń bastysy, biz jalpyǵa birdeı múmkindik beretin Ádiletti Qazaqstandy qurýǵa kiristik. Júrgizilgen reformalar óz jemisin bere bastady. Bul – bárimizge ortaq is. Sondyqtan men osy mańyzdy jumysqa atsalysqan barsha azamatqa alǵys aıtamyn», - dedi Memleket basshysy.
