Jalpyǵa birdeı deklaratsııadan bosatý sheneýnikterdiń múlkin jasyrýǵa jol ashpaı ma
ASTANA. KAZINFORM – Qarjy mınıstri Mádı Takıev jalpyǵa birdeı deklaratsııanyń sońǵy kezeńin toqtatý iri sheneýnikterdiń múlkin jasyrýǵa múmkindik ashady deıtin syndarǵa jaýap berdi.
«Áleýmettik jelide jalpyǵa birdeı deklaratsııanyń sońǵy kezeńin toqtatý bıik rangtegi sheneýnikterdiń múlkin deklaratsııadan bosatylǵan qarapaıym adamdar men zeınetkerlerdiń atyna jazý arqyly jasyrýǵa jol ashady degen pikir bar. Shynymen de solaı bolmaıtynyna qandaı kepildik bar?» - dep surady jýrnalıst.
Mınıstr ondaı synnyń orynsyzdyǵyn aıtady.
«Kelesi jyldan bastap óz múlkińizdi bireýdi atyna jaza almaısyz. Jazsańyz, ol kisige «mynansha aktıvti qaıdan aldyńyz» degen suraq týyndaıdy. Mysaly aýyldaǵy qarapaıym adamnyń atyna 100-200 mln teńgeniń múlki jazylsa, oǵan osyndaı suraq qoıamyz. Sondyqtan ondaı táýekel joq. Zeınetker de múlik satyp alsa, atyna qymbat aktıv tirkelse ony qaı jaqtan alǵanyn kórsetýge mindetti bolady. Biz kórip otyramyz, «zeınetaqysy mynandaı, sonda qymbat múlikke aqshany qaı jerden aldy» dep tekseremiz», - dedi Mádı Takıev.
Buǵan deıin ol Úkimet otyrysynda deklaratsııa tapsyrýdan bosatylatyn sanattardy ataǵan edi.
Naqtyraq aıtsaq, jalpyǵa birdeı deklaratsııanyń 4 kezeńine kiretin myna sanattaǵy azamattardy deklaratsııa tapsyrýdan bosatý kózdelip otyr: jeke qurylymdardyń qyzmetkerleri, zeınetkerler, úı sharýasyndaǵy áıelder, stýdentter jáne basqalary.
Al myna sanattaǵy azamattar sol kúıi jyl saıyn deklaratsııa tapsyra beredi:
- memlekettik qyzmetshiler;
- kommertsııalyq uıymdardyń, kvazımemlekettik sektordyń basshylary men quryltaıshylary jáne olardyń jubaılary;
- Qazaqstan Respýblıkasynan tys jerlerde aktıvteri barlarǵa jáne 1 jyl ishinde satyp alǵandar;
- bir jyl ishinde quny 20 000 aılyq eseptik kórsetkishten (74 mln. teńge) astam satyp alýlar jasaǵandar;
- óz betinshe salyq salynatyn tabys tapqandar.
