Jalpyǵa birdeı deklaratsııada syı-sııapat qalaı kórsetiledi
Memlekettik kirister komıteti óndiristik emes tólemderdi, jeke tulǵalardy jáne arnaýly salyq rejımin ákimshilendirý departamentiniń dırektory Nurjan Qýandyqov jalpyǵa birdeı deklaratsııada baǵaly syı-syıapatty kórsetý tárbitin túsindirdi, dep habarlaıdy Kazinform.
2021 jyldyń 1 qańtarynan bastap Qazaqstanda kezeń-kezeńimen jalpyǵa birdeı deklaratsııa engizilip keledi.
Bıyl ekinshi kezeńde kvazımemlekettik sektordyń memlekettik mekemeleriniń qyzmetkerleri jáne olardyń jubaılary — shamamen 2,1 mln adam deklaratsııa tapsyrady.
Úshinshi kezeńde — 2024 jylǵy 1 qańtardan bastap deklaratsııany zańdy tulǵalardyń quryltaıshylary (qatysýshylary), jeke kásipkerlik basshylary, sondaı-aq olardyń jubaılary tapsyrady (3,9 mln adam).
2025 jyly 13 mıllıonnan astam adamdy qamtý josparlanǵan.
«Jyl saıynǵy deklaratsııada (270-nysan) siz osy syılyqty kimnen alǵanyńyzdy JSN arqyly kórsetesiz. Alý kezinde de, bas tartý kezinde de bul mindetti. Syılyqty kimge bergenińizdi kórsetýińiz kerek», — dedi N. Qýandyqov Qarjy mınıstrliginde ótken baspasóz máslıhatynda.
Kirister men múlik týraly jyl saıynǵy deklaratsııada (270-nysan) baǵaly syılyqtar retinde jyljymaıtyn múlik, kólik, sheteldik kompanııadaǵy úlesi, baǵaly qaǵazdar jáne shetelde tirkelgen basqa da múlik, óz betinshe salyq salynatyn tabys retinde aqsha túrinde alynǵan syılar jáne Qazaqstanda jáne shetelde ornalasqan óteýsiz alynǵan múlikter kórsetilýi qajet.
Óteýsiz alý týraly málimetterdi memlekettik qyzmetshiler men olarǵa teńestirilgen adamdar, sondaı-aq olardyń jubaılary kórsetedi.
Eger syılyq jeke tulǵalardan alynsa jáne kásipkerlik maqsatta paıdalanýǵa arnalmasa, onda olarǵa tabys salyǵy salynbaıdy.
