Jalpyǵa arnalǵan joldarmen 25 tonnadan artyq júk tasyǵan kólikterge «Sergek» arqyly aıyppul salynady

ASTANA. KAZINFORM – Keler jyldyń aıaǵyna deıin joldaǵy kóliktiń salmaǵyn ólsheıtin 220 stantsııasy ornatylady. Bul týraly Úkimet otyrysynda Kólik mınıstri Marat Qarabaev aıtty.

«Joldarǵa salynyp jatqan úlken ınvestıtsııalardy eskersek, salynǵan jańa joldardy tıisti deńgeıde saqtap qalý asa mańyzdy.

Memleketimizde 450 myńnan astam júk kóligi tirkelse, onyń 60 myńy ruqsat etilgen 25 tonna júk tasý kólemin saqtamaıdy. Bul joldardyń buzylýyna tikeleı áser etedi. Osyǵan baılanysty karer ıeleriniń salmaq parametrlerin saqtaý boıynsha jaýapkershiligin kúsheıtý, karerlik samosvaldardyń jalpyǵa ortaq paıdalanylatyn joldarǵa shyǵýyna tyıym salýǵa tıisti zańnamalyq túzetýler ázirlendi», - dedi M.Qarabaev.

Vedomstvo basshysy atalǵan normalardy qyrkúıek aıyna deıin Májiliske kirgizip, 2025 jyldyń basynan bastap kúshine engizý josparlanǵanyn aıtty..

«Kelesi jyldyń aıaǵyna deıin avtokóliktiń qozǵalysy kezinde salmaǵyn ólsheıtin 220 stantsııalaryn ornatý jumystary bastaldy. 

Ólsheý stantsııalary – buzýshylyqtardy onlaın tirkep, aıyppuldy «Sergek» baǵdarlamasy formatynda rásimdeıtin bolady», - dedi mınıstr.