Jalpy ishki ónimniń 3 jyldaǵy ortasha ósimi 5,3 paıyzǵa teń — Úkimet boljamy
ASTANA. KAZINFORM — Búgin Senattyń jalpy otyrysynda Premer-mınıstrdiń orynbasary — Ulttyq ekonomıka mınıstri Serik Jumanǵarın elimizdiń 2026-2028 jyldarǵa arnalǵan áleýmettik-ekonomıkalyq damý boljamyn tanystyrdy.
— Bazalyq nusqaǵa sáıkes 2026 jyly jalpy ishki ónimniń naqty ósýi 5,4 paıyzdy, 3 jyldaǵy ortasha jyldyq ósýi 5,3 paıyzdy quraıdy. Nomınaldy jalpy ishki ónim 2026 jylǵy 183,8 trln teńgeden 2028 jyly 229,8 trln teńgege deıin ósedi. Ekonomıkanyń ósýi naqty sektor men qyzmet kórsetý salasyndaǵy ósýdiń esebinen qamtamasyz etiletin bolady. Óńdeý ónerkásibinde ınvestıtsııalyq jobalardyń iske asyrylýy esebinen ósý qarqyny 2026 jylǵy 6,2 paıyzdan 2028 jyly 6,6 paıyzǵa deıin ulǵaıady dep boljanady. Taý-ken óndirý ónerkásibindegi úsh jyldaǵy ortasha ósý 2,8 paıyzdy, aýyl sharýashylyǵynda — 3,9 paıyzdy, qurylysta — 11,0 paıyzdy, kólik qyzmetterinde — 10,1 paıyzdy jáne saýdada — 7,0 paıyzdy quraıdy, — dedi vıtse-premer.
Onyń dereginshe, boljam boıynsha eksport 2026 jylǵy 77,1 mlrd AQSh dollarynan 2028 jyly 83,7 mlrd AQSh dollaryna deıin, ımport — 67,7-den 75,2 mlrd AQSh dollaryna deıin ósedi. Inflıatsııa boljamy 2026 jyly 9,0-11,0 paıyz, 2027 jyly jáne 2028 jyly ortasha 6,0 paıyz deńgeıinde aıqyndalǵan. Makroekonomıkalyq kórsetkishterdiń boljamy negizinde 2026-2028 jyldarǵa arnalǵan bıýdjet pen Ulttyq qor parametrleriniń boljamy qalyptastyryldy.
— Salyq-bıýdjet saıasaty memlekettik qarjynyń ornyqtylyǵy men teńgerimdiligin qamtamasyz etýge, bıýdjet tapshylyǵyn azaıtýǵa, sondaı-aq Ulttyq qor qarajatyn menshikti qarajatpen almastyrýǵa baǵyttalǵan. Bıýdjetti boljaý bıýdjet qaǵıdalary men Memlekettik qarjyny basqarýdyń 2030 jylǵa deıingi tujyrymdamasynda belgilengen nysanaly baǵdarlarǵa negizdeldi. Kirister 2026 jyly 19,2 trln teńge kóleminde nemese jalpy ishki ónimge qatysty 10,5 paıyz deńgeıinde boljanýda. Osy jyldyń baǵalaýymen salystyrǵanda ósim 4,7 trln teńgeni qurap, 2028 jylǵa qaraı 23,2 trln teńgege deıin nemese 20,8 paıyzǵa ósýi kútilip otyr. Jalpy, respýblıkalyq bıýdjettiń menshikti kiristermen qamtamasyz etilýi 2025 jylǵy 63,7 paıyzdan 2028 jyly 83,5 paıyzǵa deıin ósedi, — dedi ol.
Serik Jumanǵarınniń sózine qaraǵanda, Ulttyq qordan kepildendirilgen transfert munaıdyń kesimdi baǵasy boıynsha eseptelgen lımıt sheginde jyl saıyn 2 770 mlrd teńge mólsherinde aıqyndaldy. 2026-2028 jyldary shyǵystardyń ósý qarqyny 108,7–109,3 paıyz deńgeıinde turaqtandyryldy.
— Osyny eskere otyryp, bıýdjettiń shyǵystary bıýdjet qaǵıdalarynda belgilengen lımıtterdi saqtaı otyryp, 2026 jyly — 27,7 trln teńge nemese jalpy ishki ónimge 15,1 paıyzdy, 2027 jyly — 28,8 trln teńge nemese jalpy ishki ónimge 14,0 paıyzdy, 2028 jyly 29,8 trln teńge nemese jalpy ishki ónimge 13,0 paıyzdy quraıdy. Kirister men shyǵystardyń osyndaı kólemderi kezinde bıýdjet nysanaly transfert túrinde Ulttyq qordan qosymsha qarajat tartýdyń qajettiliginsiz ózin-ózi qamtamasyz etedi. Fıskaldyq jáne munaı emes tapshylyqtardyń deńgeıi 2026 jyly tıisinshe jalpy ishki ónimge 2,5 paıyzdy jáne 4,9 paıyzdy qurap, 2028 jyly jalpy ishki ónimge 0,9 jáne 2,7 paıyzǵa deıin tómendeıdi dep boljanyp otyr. Osyny eskere otyryp, úkimettik borysh 2026 jyly jalpy ishki ónimge 21,4 paıyz deńgeıinde boljanyp, 2028 jylǵa qaraı jalpy ishki ónimge 19,6 paıyzǵa deıin tómendeýi kútiledi, bul belgilengen kovenanttardan aspaıdy. Jalpy, Áleýmettik-ekonomıkalyq damý boljamy, sondaı-aq bıýdjet pen Ulttyq qordyń parametrleri ulttyq ekonomıkanyń sapaly jáne serpindi damýyn nysanalaýǵa jáne memlekettik qarjynyń turaqtylyǵyn qamtamasyz etýge baǵyttalǵan, — dedi vıtse-premer.
Budan buryn halyqtyń tabysyn ınflıatsııadan qorǵaýdyń 3 jyldyq baǵdarlamasy qabyldanǵanyn jazǵan edik.