Jalpy ishki ónimdegi taý-ken óndirý sektorynyń úlesi qysqaryp keledi – Jumanǵarın
ASTANA. KAZINFORM — Orta merzimdi perspektıvada munaı-gaz sektorynyń jalpy ishki ónimniń ósimine qosatyn úlesi birtindep tómendeıdi. Bul týraly Úkimet otyrysynda Premer-mınıstrdiń orynbasary – Ulttyq ekonomıka mınıstri Serik Jumanǵarın aıtty.
- Memleket basshysy Úkimettiń keńeıtilgen otyrysynda aıqyndap bergen mindetterge sáıkes ekonomıkany odan ári ártaraptandyrý ekonomıkalyq ósýdiń sapaly túrde jańa modelin qalyptastyrýǵa baǵyttalý tıis. Birinshi kezekte jańa ınvestıtsııalar eldiń zamanaýı ónerkásiptik negizin qalyptastyrýǵa shoǵyrlandyrylýy qajet. Osyǵan baılanysty joǵary qosylǵan qun qalyptastyra alatyn óńdeýshi jáne joǵary tehnologııalyq óndiristerdi damytý basym baǵytqa aınalýda, - dedi Serik Jumanǵarın.
Onyń atap ótýinshe, 2025 jyly el ekonomıkasy turaqty ári sapaly ósýdi kórsetti.
- Orta merzimdi perspektıvada munaı-gaz sektorynyń jalpy ishki ónimniń ósimine qosatyn úlesi birtindep tómendeıdi. Bul tómendeý óńdeýshi ónerkásiptiń, qurylys, aýyl sharýashylyǵy jáne munaı-gaz sektorynan basqa salalardyń ozyq damýymen óteledi, - dedi ol.
Vıtse-premer qurylymdyq ózgerister qazirdiń ózinde aıqyn baıqalyp otyrǵanyn aıtty.
- Eger 2010 jyly óńdeýshi ónerkásiptiń jalpy ishki ónimdegi úlesi 11,3 paıyz bolsa, 2024 jyly ol 12,4 paıyzǵa deıin ósti. Sonymen qatar taý-ken óndirý sektorynyń úlesi eki esege jýyq – 19,5 paıyzdan 12 paıyzǵa deıin, onyń ishinde munaı men gaz óndirý úlesi 16,5 paıyzdan 8,1 paıyzǵa deıin qysqardy, - dedi vıtse-premer.
Aıta keteıik, Úkimet otyrysynda ekonomıkany odan ary ártaraptandyrý tásilderi pysyqtalyp jatyr.