Jalpy ishki ónimdi 2029 jylǵa qaraı eki ese arttyrý mindeti tur — Serik Jumanǵarın

ASTANA. KAZINFORM — Úkimet Memleket basshysynyń Qazaqstan halqyna Joldaýynda júktelgen mindetter boıynsha basty baǵyttardy atady. Bul týraly Premer-mınıstrdiń orynbasary — Ulttyq ekonomıka mınıstri Serik Jumanǵarın málim etti. 

— Jalpy ishki ónimdi 2029 jylǵa qaraı eki ese arttyrý mindeti tur. Osy maqsatta joǵary ınvestıtsııalyq belsendilikti yntalandyrýdaǵy memlekettiń belsendi róli esebinen ekonomıkalyq ósýdiń jedel qarqyny qamtamasyz etiledi. Úkimet jahandyq básekege qabilettiligi joǵary eksporttyq óndirister qurý baǵytynda avtomobıl jasaý, temirjol mashınalaryn jasaý, hımııa ónerkásibi jáne munaı-hımııa, sırek kezdesetin metaldardy qosa alǵanda mıneraldyq-shıkizat bazasyn tolyqtyrý, sondaı-aq agroónerkásiptik keshen ónimderin qaıta óńdeý sııaqty perspektıvaly baǵyttardy aıqyndap otyr, — dedi Serik Jumanǵarın Úkimet otyrysynda.

Vıtse-premerdiń málimdeýinshe, atalǵan salalarǵa baǵyt burý ekonomıkanyń ósýine yqpal etedi.

— Osy ólshemsharttardy eskere otyryp, salalyq mınıstrlikter ákimdiktermen birlesip naryqty naqty túsinýmen, ınvestıtsııa qajettilikterimen, jobalardyń boljamdy geografııalyq ornalasýyna qaraı jobalar tizbesin aıqyndaý boıynsha jumys júrgizedi. «Investıtsııaǵa tapsyrys» jobasynyń jalpy josparlanǵan somasy 5 trln teńgeden asady. Taldaý, qurylymdaý jáne ınvestıtsııa tartý boıynsha jumys «Báıterek» holdıngimen júrgiziledi, — deıdi mınıstr.

Odan ári Úkimet basshysynyń orynbasary Memleket basshysynyń Qazaqstan halqyna Joldaýynda júktelgen mindetter boıynsha basty baǵyttardy atady:

— Jańa ınvestıtsııalyq tsıkl;

— Alatau City-dy damytý;

— Inflıatsııamen kúres;

— Importqa táýeldilikti azaıtý;

— Ekonomıkany yryqtandyrý jáne kásipkerlikti damytý.

Búgin Úkimet Prezıdent Joldaýyn júzege asyrý joldaryn pysyqtap, talqylap jatyr.