Jalpy saılaý: Ulybrıtanııada bás tikkenderdiń basy bálege qaldy
LONDON.KAZINFORM - Ulybrıtanııada bılik partııasy taǵy bir bylyqqa batyp, saıası janjaldyń ortasynda qaldy. Joǵary laýazymdy sheneýnikter Jalpy saılaý kúniniń ótetin ýaqytyn aldyn ala bilip, bás tikken. Olardyń ınsaıderlik aqparatty paıdalanyp, tabys tapqysy kelgeni málim boldy. Birneshe adam tergelip, depýtattyqqa túskenderi saılaýdan shettetilip jatyr, dep habarlaıdy Kazinform-nyń Tumandy Albıondaǵy tilshisi.
Parlamenttik saılaý 4-shi shildede ótedi. Bul týraly kópshilikke 22-shi mamyrda jarııa etildi. Naqty ótetin kúni tek sanaýly adamǵa ǵana belgili boldy. Sodan olar býkmekerlik keńsege baryp, bás tigip, baıýdyń amalyn izdepti. Elde saıası boljamdar jasap, utysqa qatysýǵa ruqsat etilgen. Biraq qupııa ınsaıderlik aqparatty aldyn ala bilip, paıdaǵa kenelgisi keletinder zań aldynda jaýap beredi. Premer-mınıstr ashýǵa minip, kúdiktilerdiń kinási tolyq dáleldense, partııa qatarynyn bosatatynyn kesip aıtty.
«Aıyptaýlar týraly estigennen keıin men qatty ashýlandym. Biz táýelsiz ishki tergeýdi bastap kettik jáne kúdiktilerdi tekserý kezinde qyzmetinen ýaqytsha bosattyq. Polıtsııa da iske aralasty. Eger olardyń erejelerdi buzǵany anyqtalsa, onda, árıne, zań talaptaryna sáıkes jaýap beredi. Men kániliniń partııadan qýylýyn qadaǵalaımyn», — dedi Ulybrıtanııanyń premer-mınıstri Rıshı Sýnak.
Qumar oıyndary boıynsha komıssııa jıyrmaǵa jýyq depýtattyń tergelip jatqanyn aıtty. Daýly iske jergilikti polıtsııa qyzmetkerleriniń, Rıshı Sýnaktyń kómekshisiniń jáne jeke kúzetshisiniń de qatysy bar ekendigi anyqtaldy. Olar saılaý kúnin sozbalańǵa salyp, jarııa etpegen premerdiń jaıbasarlyǵynan aqsha jasaǵysy kelgen bolyp shyqty.
«Meniń oıymsha, premer-mınıstr erte bastan jyldam áreket etip, kóshbasshylyq minez tanytýy kerek edi. Al ol bizdiń májbúrlegenimizdi kútkendeı. Biz erejelerdi buzatyn, tipti elemeıtin konservatorlardyń ersi qylyǵyna jıi kýá bolyp kelemiz. Muny toqtatyp, tarıhtyń jańa paraǵyn ashýymyz kerek jáne saıasat pen elimizdi qaıta qurýymyz qajet», — dedi oppozıtsııalyq Leıborıster partııasynyń kóshbasshysy Kır Starmer.
Keıinirek janjalǵa konservatorlar ǵana emes, leıborısterdiń de qatysy bar ekendigi belgili boldy. Saıası partııalar tergelip jatqan kandıdattardy qoldaýdan túbegeıli bas tartty. Jańa saýalnamaǵa sáıkes, shýly oqıǵadan keıin Konservatıvti partııany qoldaýshylardyń sany tipti tómendep ketti.
«Qaıda bet alǵanymyz men úshin beımálim. Bizge ózgeris qajet. Saıyp kelgende, biz Leıborıster partııasyn tańdaımyz. Starmer óz ýádelerin oryndaı ma, álde oppozıtsııa bılikke kelgennen keıin ony basshylyqtan alyp tastaı ma, ol jaǵy belgisiz», — dedi London turǵyny.
«Men munda zańsyz mıgranttardyń kún saıyn qaıyqpen júzip kelgenin qalamaımyn. Konservatorlar muny toqtatamyz dedi, biraq sátsizdikke ushyrady. Leıborıster? Olardyń bul baǵytta ne isteı alatynyn tipti bilmeımin», — dedi taǵy bir qala turǵyny.
Rıshı Sýnaktyń aldyńǵy áriptesteri abyroıdan aıyryldy. Borıs Djonson karantın kezinde Daýnıng strıtte oıyn-saýyq quryp, konservatorlardyń bedeline nuqsan keltirdi. Odan keıin Lız Trass bılikke kelip, 49 kún ishinde el ekonomıkasynyń astan-kesteńin shyǵardy. Salyq kólemin negizsiz túsiremin dep, qarjy naryǵyn alaı-dúleı qyldy. Sýnak ózin olardan oqshaý ustamady jáne saıası álsizdigin kórsetti, deıdi sarapshylar.
«Menińshe, Sýnaktyń baılyǵy kóp bolǵan soń saılaýshylar ony súımeıdi. Keıde saıasatker ózin qarasha halyqtan alshaq ustaıdy. Meniń oıymsha, sol sebepti ol partııany tórge emes, kórge súırep júrgendeı. Premer-mınıstrdi kópshilik álsiz kóshbasshy sanaıdy», — deıdi Patshaıym Marııa ýnıversıtetiniń professory Tım Beıl.
Jalpy saılaýda jeńiske jetkender Vestmınster saraıynyń tórinde otyrmaq. Qoǵamdyq pikir zertteýlerine sáıkes 14 jyl basshylyq etken Konservatorlar partııasy aldaǵy beısenbide bılikpen qoshtasady.
