Jalpy otyrys: Erlan Qoshanov depýtattyq korpýsqa alǵysyn aıtty

ASTANA. KAZINFORM — Májilis tóraǵasy Erlan Qoshanov referendým nátıjesine qatysty pikir aıtty.

— Búgingi bas qosýymyzdyń orny bólek. Ol — Májilistiń jańa Ata zań qabyldanǵannan keıingi birinshi jalpy otyrysy. Keshe Konstıtýtsııanyń qabyldanýyna arnalǵan saltanatty jıyn ótkenin bilesizder. Onda Memleket basshysy Ata zań el damýyndaǵy jańa dáýirge jol ashatynyn atap ótti. Biz Qýatty, Ádiletti jáne Progressıvti Qazaqstandy qurý jolynda batyl qadam jasadyq. Referendým elimizdiń Prezıdent baǵdarynyń mańaıyna uıysyp, barynsha tutastana túskenin kórsetti. Jurtshylyqtyń osy tarıhı iske belsene qatysyp, jańa Konstıtýtsııany 87% qoldap daýys berýi — halyqtyń Memleket basshysyna degen zor seniminiń aıqyn dáleli. Ata zańǵa tikeleı uıytqy bolyp, oǵan kóptegen progressıvti novellalar engizgen Prezıdentimizdiń naǵyz jeńisi. Buǵan álem elderi de nazar aýdaryp, laıyqty baǵasyn berdi, — dedi E. Qoshanov Májilistiń jalpy otyrysynda. 

Osy oraıda ol Memleket basshysynyń atyna shet memleketterdiń basshylarynan quttyqtaýlar kelip jatqanyn aıtty. Bul rette, jańa Halyqtyq Konstıtýtsııanyń halyqtan jappaı qoldaý tapqany — Parlament úshin zor mereı.

— Buǵan óńirlerdegi kezdesýler barysynda da naqty kóz jetkizdik. Depýtattar Koalıtsııa quramynda barlyq aımaqty aralap shyqty. Eńbek ujymdarymen kezdesip, aýyl-aýylda, aýdandar men qalalarda turǵyndarmen ashyq áńgime órbittik. Jańa Ata zań mátinin ázirleýge de áriptesterimiz bir kisideı atsalysty. Sol úshin búkil depýtattyq korpýsqa shynaıy alǵysymdy bildiremin. Keshe biraz depýtat tikeleı Prezıdent qolynan joǵary nagrada aldy. Sondaı-aq, saıası partııalardyń da qosqan úlesin erekshe atap ótken jón. Jaýapty sátte bárimiz birge jumylyp, Memleket basshysyna qoldaý kórsete bildik, — dedi Májilis tóraǵasy.

Atap aıtqanda, Konstıtýtsııa 1 shildeden bastap resmı túrde kúshine enedi.