Jalpaqtal sý qoımasyn salý qajet - senator
ASTANA. QazAqparat - Batys Qazaqstan oblysynda Jalpaqtal sý qoımasyn salý qajet. Mundaı usynysty búgin QR Premer-Mınıstri Baqytjan Saǵyntaevtyń atyna depýtattyq saýal joldaǵan senator Erbolat Muqaev jasady, dep habarlaıdy QazAqparat tilshisi.
«Másele Jalpaqtal sý qoımasyn salý tóńireginde bolyp otyr. Óıtkeni osydan birneshe jyl buryn Senat deptýtattary Kırov-Shejin arnasyn jóndeý jóninde másele kótergen bolatynbyz. Bul másele qoldaý taýyp, 7 jyldyń ishinde 180 shaqyrym arna búgingi tańda bitip tur. Jýyrda Elbasynyń Joldaýyna baılanysty sol eldi mekenderde bolyp, arnanyń boıymen júrip óttik, jergilikti halyqpen kezdestik. Halyq Elbasyna alǵysyn bildirip, Úkimetke rızashylyǵyn aıtyp otyr», - dedi senator.
Onyń sózine qaraǵanda, endigi másele sol Kırov-Shejin arnasyna keletin sýdan 30 mln tekshe metr sý saqtaıtyn qoma salý tóńireginde bolyp otyr. Jalpy, bul másele buǵan deıin de kóterilgen.
«Qazirgi ýaqytta Sý komıtetiniń tarapynan sý qoımasynyń jobalyq-smetalyq qujaty bitpeı otyr. Sondyqtan Jalpaqtal sý qoımasyn salýǵa jáne onyń aıaqtalýyna septigińizdi tıgizýińizdi suraımyz», - dedi Erbolat Muqaev.
