Jalǵyzbasty oralmandarǵa bólek kvota beriledi - Nurjan Áltaev
ASTANA. QazAqparat - Kóshi-qon máselesine arnalǵan jańa zań jobasynda jalǵyzbasty oralmandardyń mártebesin anyqtaý josparlanǵan. Osy sanattaǵy azamattardyń kvotasy da bólek bolady, dep xabarlaıdy QazAqparat tilshisi.
QR Eńbek jáne xalyqty áleýmettik qorǵaý vıtse-mınıstri Nurjan Áltaevtyń aıtýynsha, búgingi zańnamada «qonys aýdarýshylar men olardyń otbasy músheleri» ǵana kórsetilgen. Al jańa zań jobasy boıynsha qonys aýdarýshylardy jeke-jeke, sonyń ishinde nekege turmaǵan azamattardy da memlekettik qoldaý sharalarymen qamtyp, óńirlik kvotaǵa engizý josparlanyp otyr.
«Buǵan deıin oralmandardyń otbasyna ǵana kvota bólindi. Ókinishke qaraı, zańda sondaı bir olqylyq boldy. Al jalǵyzbasty oralmandardyń zańdy mártebesi bolmady. Ondaı azamattar az emes. Endi, jańa zań jobasy aıasynda otbasy bar oralmandar ǵana emes, jalǵyzbasty oralmandar da kvota ala alady», - dedi N.Áltaev Astanada ótken baspasóz máslıxatynda.
Budan bólek, oralmandardyń Qazaqstan azamattyǵyn alýyna qatysty san alýan máseleler bar. Atap aıtqanda, bir jyldyń ishinde azamattyqty alyp úlgermegen oralmandar az emes. Osyǵan baılanysty oralman mártebesin uzartý týraly sheshim qabyldandy. Ol da jańa zańnyń jobasynda bar.
«Endi, oralman mártebesin úsh aıǵa sozýǵa bolady. Ol úshin jergilikti atqarýshy organdarǵa ótinish berý kerek. Biraq ondaı múmkindik bir ret qana beriledi. Al ótinishti oralman mártebesi aıaqtalǵannan keıin alty aıdyń ishinde jazýǵa bolady», - dep atap kórsetti N.Áltaev.
Vıtse-mınıstrdiń sózine qaraǵanda, qazirgi kezde «oralman» degen sózdiń ornyna «otandas» jáne taǵy basqa termınderdi qoldaný máselesi qaralyp jatyr.
«Bul másele saraptamadan ótýi kerek. Sol kezde kóremiz, ne qaldyramyz, ne basqa termınge ótetin bolamyz. Komıssııa óz jumysyn aıaqtaǵannan keıin belgili bolady», - dedi N.Áltaev.
Aıta ketken jón, Táýelsizdik alǵaly beri Qazaqstanǵa 1 mıllıonnan astam oralman kóship keldi. Olardyń basym bóligi - Ózbekstannan oralǵandar. Ótken jyly kelgen otandastardyń sany 18 605 adam boldy. Bıyl odan da kóp bolady degen boljam bar. Oralmandarǵa qatysty jańa zań jobasy Prezıdenttiń qol qoıýyna jiberildi.
Foto: ec-sport.kz
