Jalǵyzbasty áıelderdi aldap kelgen temirtaýlyq jigit SQO-da ustaldy
PETROPAVL. QazAqparat – Petropavlda jalǵyzilikti áıelderdiń senimine kirip, keıin páterlerin tonaǵan Temirtaý qalasynyń turǵyny ustaldy, dep habarlaıdy QazAqparat tilshisi.
Soltústik Qazaqstan oblysy Polıtsııa departamenti baspasóz qyzmetiniń málimetinshe, krımınaldyq polıtsııa qyzmetkerleri Petropavl qalalyq polıtsııa basqarmasyndaǵy áriptesteriniń kómegimen izdeýde júrgen Temirtaý qalasynyń turǵynyn ustady. Buǵan deıin sottalǵan 34 jastaǵy er adam jalǵyzilikti áıeldermen tanysyp, olardyń senimine kirgen. 1-2 aıdan keıin páterde eshkim bolmaǵan kezde qolyna túsken baǵaly zattardy alyp, izin jasyrǵan. Ol osyǵan uqsas qylmystardy Pavlodarda, Temirtaý men Abaı qalalarynda (Qaraǵandy oblysy) jasaǵan.
Er adam sáýir aıynan beri izdeýde bolǵan. Qylmysker Petropavlda júrýi múmkin degen aqparat túsisimen soltústikqazaqstandyq polıtseıler jedel-tergeý is-sharalaryn júrgizdi. Sonyń ishinde jalǵa beriletin páterler tekserildi. Solardyń birinde er adam ustaldy.
«Er adam jalǵyzilikti áıelmen turǵan. Áıel ony óz aqshasyna asyrap kelgen. Kúdikti jalǵan esimmen tanysqan. Qazirgi ýaqytta ol Temirtaý qalalyq polıtsııa basqarmasyna berildi. Jalpy, jyl basynan krımınaldyq polıtseıler oblys boıynsha 7 qylmyskerdiń júrgen jerin anyqtady. Sondaı-aq qaraǵandylyq áriptesterimiz úshin bir qylmyskerdi jáne sheteldik quqyq qorǵaý organdary úshin 12 adamdy ustap berdik», - deıdi SQO PD krımınaldyq polıtsııa basqarmasynyń bastyǵy Petr Klımov.
