«Jalǵyz reındjer» fılmi 4 shildeden bastap qazaq tilinde kınoteatrlardan kórsetile bastaıdy
ASTANA. 29 maýsym. QazAqparat - «Karıb teńiziniń qaraqshylary» týyndysymen belgili amerıkalyq prodıýser Djerrı Brýkhaımer men rejısser Gor Verbınskı «Jalǵyz Reındjer» atty jańa fılmin Máskeýge alyp keldi. Basty rólderdi somdaǵan gollıvýdtyq juldyzdar Djonnı Depp pen Armı Hammer tusaýkeserge qatysyp, óz kórermenderi men talantyna tabynýshylaryn bir qýantty. Bul týraly «Qazaqstan» Ulttyq arnasynyń baspasóz qyzmetinen habarlady.
«Jalǵyz reındjer» fılmi 4 shildeden bastap kınoteatrlardan kórsetile bastaıdy. «Dısneı» stýdııasy túsirgen bul fılm «Bolashaq» qaýymdastyǵynyń qoldaýymen qazaq tiline de aýdaryldy. Al onyń Qazaqstandaǵy basty aqparattyq demeýshisi - Ulttyq arna.
Úndister men aqtardyń aqparylysy. Shatqaldardy sharlaǵan kovboılar. Bul taqyryp Gollıvýdtyq fılmderge jıi arqaý bop jatady. Áıtse de, rejısser Gor Verbınskı «Jalǵyz Reındjer» fılminde bul sıýjetti burynǵydan ózgeshe kórsetýge tyrysyp baqqan. Basty keıipkerler - ádildik úshin kúresetin úndis Tonto men reındjer Djon. Olardy gollıvýdtyq juldyz Djonnı Depp pen jas akter Armı Hammer somdaǵan.
«Men óz rólimdi somdaý arqyly Amerıkanyń baıyrǵy turǵyndary úndisterge degen qurmetimdi kórsetkim keldi. Sebebi Hrıstofor Kolýmb Amerıkany ashyp, ony mekendeıtin halyqqa úndister dep at qoıǵansha, olar ózimen-ózi tirshilik keship jatqan birneshe ǵasyrlyq baı tarıhy bar halyq edi. Biz úndisterdi buǵan deıin túsirilgen basqa fılmderden erekshe qylyp kórsetýge tyrystyq», - dedi akter Djonnı Depp bizge bergen suhbatynda.
Fılmniń Máskeýdegi alǵashqy kórsetilimine túsirý toby tolyǵymen keldi. Ulttyq arnaǵa jeke suhbat bergen Gollıvýd juldyzdary elimizge sálem joldap, halqymyzdy kele jatqan Astana kúnimen quttyqtady.
