Jalǵyz qyzynan kóńili qalǵan aqtóbelik qarttar úıinde turyp jatyr
AQTÓBE. QazAqparat - Aqtóbedegi qarttar men múgedekter úıinde 80 jastaǵy turǵyny Marııa Birekeshova turady. Ol zeınetaqysyn alyp, ózine kútim jasamaǵan qyzynan bas tartqan, dep habarlaıdy QazAqparat tilshisi.
Aqtóbe oblysy, Hromtaý aýdany, Maǵadjan aýylynda turǵan Marııa Birekeshova kúzde qarttar men múgedekter úıin panalady. 80 jastaǵy qarııa jas kezinde sıyr sýyp, shóp shaýyp, keıin mektepte eden jýdy. Ul men qyz tárbıelegen ana 90-shy jyldary jubaıynan, sosyn ulynan aıyrylyp, jalǵyz qyzymen qaldy. Qyzyn baǵyp-qaǵyp, oqytyp qatarǵa qosty. Biraq ol munyń bári beker dep otyr.
«Táýelsizdiktiń alǵashqy jyldary kúıeýim jol apatynan qaıtys bolyp, ulym kóz jumdy. Bar tapqanymmen jalǵyz qyzymdy oqyttym, ol muǵalim mamandyǵyn aldy. Qazir Aqtóbe qalasyndaǵy meıramhanalardyń birinde ákimshi bolyp jumys isteıdi. Aýdannan qalaǵa kóship, shaǵyn úı aldyq. Qyzym kúıeýge shyqty, biraq taǵdyrdyń jazýymen onyń da joldasy qaıtys boldy. Bir ul, bir qyzy bar. Jıenim kúıeýge shyqty, uly úılengen joq. 24 jastaǵy jıenimmen qyzym bir úıde turyp jatyr. Meniń zeınetaqymdy alady, biraq qaramaıdy, jaǵdaıymdy jasamaıdy. Tamaq ákelip bermeıdi, sóılespeıdi. Eshqandaı renish joq bolsa da, ashylyp sóılespeıdi»,- dedi Marııa Birekeshova.
Qarııa 2013 jyly onkologııalyq dertke shaldyǵyp, ota jasatty. Sodan beri únemi tekserilip, dári qabyldaıdy. Sonymen qatar, qos janaryna eki ret ota jasaldy. Bos ýaqytyn tıimdi ótkizýdi qalap, túrli zattar tigip, toqıtyn qarııa búginde bárinen bas tartty. Sebebi, kózge kúsh túsirýge dárigerler tyıym salǵan.
«Úıde jaǵdaıym bolmaǵan soń ózim sheshim qabyldadym. Ákimdikke, áleýmettik qorǵaý ortalyǵyna baryp, aqyldastym. Jaǵdaıymdy aıtyp, keńes suradym. Úıden ınternatqa kóshetin kezde qyzyma «jaǵdaıym joq, baqpaısyń» dep aıttym. Sol kezde qyzym «qaıda ketseń onda ket» dedi. Jınalyp, ketip qaldym. Týǵan qyzyma kerek bolmaǵanda, jıenime kerekpin be?»,- dedi ol.
Alǵashynda óz úıin saǵynǵan Marııa Birekeshova qazir janyndaǵy zamandastaryna úırendi. Keıde ózge bólmede turatyndarǵa qonaqqa baryp, áńgimelesedi. Ómirdiń qıyndyǵyna moıymaǵan qarııa áli de tyń. Ol dene jattyǵýyn jasap, boıyn sergitedi. Kóńili qalaǵan kezde tamaq pisirip, et asady.
«Zeınetaqyma dári alamyn, keıde tamaq pisirip jeımin. Sháı quraldaryn alamyn. Bazarǵa baramyn, keıde tanys balalarǵa qajetti zattarymnyń tizimin beremin. Saǵynǵan kezde et alyp, asyp jeımiz»,- dedi ol.
Aıta keteıik, Aqtóbedegi qarttar men múgedekter úıinde 200-den astam adam turady. Olardyń basym bóligi múgedek.
