Jalǵyz basty áıeldi aıýandyqpen óltirgen azǵyn 26 jylǵa sottaldy - Almaty oblysy
TALDYQORǴAN. QazAqparat - Almaty oblysynda 36 jastaǵy áıeldi zorlap, artynsha óltirgen azǵyn 26 jylǵa sottaldy. Marqum áıeldiń artynda 6 jastaǵy qyzy qaldy, dep habarlaıdy QazAqparat tilshisi.
Almaty oblysynyń qylmystyq ister jónindegi mamandandyrylǵan aýdanaralyq sotynda qaralǵan iste, aıyptalýshynyń buǵan deıin tonaý jáne urlyq qylmystary boıynsha sottalǵany anyqtaldy. Oblystyq ІІD baspasóz qyzmetiniń málimetinshe, jalǵyz basty áıeldi aıýandyqpen óltirgen azǵyn 35 jasta, Almaty qalasynyń turǵyny. Qandy oqıǵa 2017 jyldyń 17 jeltoqsanynda Kóksý aýdanyndaǵy Terekti aýylyndaǵy jer úılerdiń birinde tirkelgen.
«Kúdikti Taldyqorǵandaǵy avtovokzaldan tabyldy. Ol qylmysyn jasyrý maqsatynda polıtseılerden izin sýytpaq bolǵan. Tergeý barysynda anyqtalǵandaı, kúdikti kúndiz áıeldiń úıine barǵan. Biraq jalǵyz basty ana ony úıine kirgizbegen. Al keshkisin kúdikti ishimdik iship, túnde áıeldiń úıine basa-kóktep kirgen. Zorlap, artynsha óltirgen. Al marqum bolǵan áıeldiń qyzy aman qaldy. Ol sol qandy qylmys bolǵan túni úıdiń basqa bólmesinde bolyp, qylmyskerdiń kózine túspeı qalǵan», dep málim etti oblystyq ІІD baspasóz qyzmeti.
Kúdiktiniń qylmysy tolyqtaı dáleldendi. Sottalýshy burynǵy ótemegen jazasyn barlyǵyn qosqanda túrmede 26 jylyn ótkizedi.
Al anasynan aıyrylǵan 6 jastaǵy qyz bala memlekettiń qamqorlyǵyna alynady.
Foto: rostovgazeta.ru
