Jalǵyz oqýshydan turatyn synyp: Aqtóbe bilim basqarmasy jaǵdaıdy túsindirdi
AQTÓBE. KAZINFORM — Qujat qabyldaý, synyptyń ashylatynyn bildirmeıdi. Mektep ákimshiligi balany mektep-ınternatqa ornalastyrýǵa usynys berdi.
Temir aýdany Shubarqudyq kásipshiligi aýylynyń turǵyny óziniń bir balasy úshin bir synyp ashylǵanyn aıtyp, áleýmettik jelide jazba qaldyrdy.
— Meniń balam jylǵyz ózi birinshi synypqa barady. Bir synyp — bir oqýshy. Ata-analar chaty bolmaıdy, 25 anamen birge ata-analar jınalysy ótpeıdi. Barlyq ananyń armany osy ma?.. Bizdiń aýylda orys synybyna bala jınalmady, sondyqtan biz ǵana bolamyz. Synyp emes, jeke oqý bolady, — dep qaldyrǵan Kriissew óz jazbasynda.
Aqtóbe oblystyq bilim basqarmasynyń baspasóz qyzmetiniń habarlaýynsha, qazirgi kezde qujat qabyldaý júrip jatyr. Bir oqýshynyń qujat tapsyrýy bir synyp ashylady degen sóz emes.
— Eger oqýshy sany jetpese, balalar jaqyn mańdaǵy bilim ordasyna jiberiledi. Ázirge naqty sheshim qabyldanbady, — dedi baspasóz qyzmeti.
Bul jaǵdaıda aýylǵa jaqyn ornalasqan aýdan ortalyǵyndaǵy mektep-ınternatqa ornalastyrý týraly usynys berilgen.
Aıta keteıik, Temir aýdany Shubarqudyq kásipshiligi aýylynda 1500-den astam adam turady. № 2 Shubarqudyq qazaq-orys jalpy bilim beretin mektepte 365 oqýshy bar. Barlyǵy 18 synyptaǵy 323 oqýshy qazaq tilinde, 8 synyptaǵy 42 oqýshy orys tilinde bilim alady.
Eske salsaq, Aqtóbe mektepterinde 400-ge jýyq pedagogtiń orny bos tur. Muǵalim qala jáne barlyq aýdan mektebine kerek.
