Jalǵas Jumaǵulov Taıson Nemdi aıqyn basymdyqpen utty
ASTANA. QazAqparat - Búgin Almatyda FIGHT NIGHTS GLOBAL 86 aralas jekpe-jek týrnıriniń basty aıqasynda qazaqstandyq Jalǵas Jumaǵulov amerıkalyq Taıson Nemge qarsy shyqty, dep habarlaıdy «SPORTINFORM» SAA.
Sportshylar 56,7 keli salmaq dárejesinde kúsh synasty. Birinshi raýndta Taıson Nem Jalǵasty aıaǵyna jýytpaı tike turyp shabýyl jasaýǵa májbúrledi. Jumaǵulov qarsylasynyń osy áreketine kónip, qarsylasymen judyryq almasty. Nem sol qolmen týra soqqylardy jáne búıirden soqqyny kóbirek jumsasa, Jalǵas kóbinese apperkot jasap, aınalyp soqty.
Bes raýndqa sozylǵan aıqas eki sportshyǵa da ońaı soqpady. Bir márte Jalǵas aıaqtan shap berip, alyp jyqty. Taıson úırenshikti nokaýtqa túsiretin soqqysyn jasaýǵa qansha ońtaılanǵanymen Jalǵas qarsylasynan ońaı sytylyp ketip, oǵan múmkindik bermedi.
Nemniń ár qateligi Jalǵastyń aýyr soqqysymen aıaqtalyp jatty.
Jekpe-jek sońǵy raýndtyń aıaqtalǵanyn bildirgen dabyl soǵylǵansha jalǵasty.
Jekpe-jektiń jeńimpazy Jalǵas Jumaǵulov dep tanyldy.
Qazaqstandyq osymen 11-shi márte jeńiske jetse, onyń qarsylasy Taıson Nem sporttaǵy mansabynda toǵyzynshy márte jeńiliske ushyraǵan.
