Jalǵan júrgizýshi kýáligin jasaǵan jol polıtsııasy qyzmetkerine qatysty aıyptaý úkimi shyǵaryldy
ASTANA. 13 tamyz. QazAqparat /Qanat Mámetqazyuly/ - Astana qalasy Almaty aýdandyq № 2 soty Astana qalasy ІІD Jol polıtsııasy basqarmasynyń Tirkeý-emtıhan jumystary tobynyń izdestirý jónindegi maman-ınspektory N.Mahanovqa qatysty úkim shyǵardy.
Aıypty jalǵan qujattar negizinde kólik quraldaryn júrgizý quqyǵyna arnalǵan eki júrgizýshi kýáligin zańsyz bergen. Bul týraly Bas prokýratýranyń baspasóz qyzmetinen habarlandy.
«N.Mahanov QR QK 307-babynyń 2-bóliginde kózdelgen qylmysty jasaǵany úshin kináli dep tanylyp, 2 jylǵa bas bostandyǵynan aıyrý úkimi shyqty. Oǵan QR QK 63-baby qoldanyla otyryp, 2 jyl synaq merzimimen shartty túrde sottaldy», - delingen baspasóz aıǵaǵynda.
Esterińizge sala keteıik, baspasóz qyzmetiniń habarlaýynsha, aǵymdaǵy jyldyń 25 mamyrynda sot Astana qalasy ІІD Jol polıtsııasy basqarmasynyń burynǵy qyzmetkerleri jol polıtsııasy jeke batalony izdestirý qyzmetiniń ınspektory E.Insebaevqa jáne jeke batalon 1-shi vzvodynyń jedel ýákiletti qyzmetkeri A.Ismýrzınge qatysty da osyǵan uqsas úkim shyǵarǵan bolatyn. Olar jalǵan anyqtama negizinde júrgizýshi kýáligin zańsyz bergeni úshin para berýge arandatqany jáne qyzmettik jalǵandyq jasaýǵa járdemdeskeni úshin aıyptaldy. E.Insebaev pen A. Ismýrzın QR QK 28-babynyń 4-bóligi, 312-babynyń 2-bóligi boıynsha kináli dep tanylyp, 2 jylǵy shartty túrde qylmystyq jazalaýǵa sottaldy.
