Jalǵan jumysqa ornalastyrý arqyly 1 mlrd teńgeden astam áleýmettik tólem urlandy — QMA

ASTANA. KAZINFORM — Qarjylyq monıtorıng agenttigi júktilik pen bosanýǵa baılanysty járdemaqylardy jáne ataýly áleýmettik kómek tólemderin zańsyz taǵaıyndaý derekterin anyqtady. 2024-25 jyldary agenttik jalpy somasy 1,2 mlrd teńgege zalal keltirgen 13 qylmystyq isti qarady.

Júktilik pen bosanýǵa baılanysty járdemaqylar boıynsha 10 is tergelip, 15 adam jaýapqa tartyldy.

Jalǵan jumyspen qamtý shemasy:

385 júkti áıeldi jalǵan kásipkerlikterge jumysqa ornalastyrý arqyly memleketke 1 mlrd teńgeden astam shyǵyn keltirilgen.

• Aqtóbe oblysynda Ómirbekova men Baımurzaeva 70 áıeldi 29 JShS-ǵa jalǵan jumysqa ornalastyryp, 487 mln teńgeni jymqyrǵany úshin 6 jylǵa bas bostandyǵynan aıyryldy.

• Shymkent qalasynda Dúısenova osyǵan uqsas áreketi úshin 98 mln teńge zalal keltirip, 5 jylǵa sottaldy.

Barlyq isterde qylmys bir ádispen jasalǵan: áıelder arnaıy qurylǵan kásipkerlikterge jalǵan jumysqa qabyldanyp, ótken kúnmen eń joǵary áleýmettik jáne zeınetaqy aýdarymdary rásimdelgen. Sonyń negizinde joǵary tólemder taǵaıyndalǵan.

Ataýly áleýmettik kómek boıynsha:

15 jumyspen qamtý jáne áleýmettik baǵdarlamalar bólimderiniń laýazymdy tulǵalaryna qatysty 3 is qozǵaldy.

Shema bas býhgalterlerdiń senimdi adamdardy áleýmettik osal topqa jatpaıtyn bolsa da kómek alýshylar tizimine qosýynan turǵan. Keıin olarǵa qarajat aýdarylyp, qolma-qol aqshaǵa aınaldyrylǵan.

- 2023 jyldan beri eGov portaly arqyly qujat rásimdeý men mártebe berý protsesiniń tsıfrlandyrylýy mundaı alaıaqtyqtarǵa jol bermeıtin boldy, - delingen aqparatta.

Agenttik Eńbek jáne halyqty áleýmettik qorǵaý mınıstrligine qylmystardyń jasalýyna yqpal etken sebepterdi joıý úshin usynystar joldady.

Erejelerge ózgeris engizildi: endi járdemaqy taǵaıyndaý kezinde «ótken kúnmen» tólengen zeınetaqy jarnalary esepke alynbaıdy.

Agenttik memlekettiń ekonomıkalyq múddelerin qorǵaý baǵytyndaǵy jumystardy jalǵastyryp jatyr.

Aıta keteıik, QMA kommertsııalyq emes uıymdardyń kúdikti operatsııalaryna taldaý júrgizedi.