Jalǵan júktilik anyqtamasy áshkere boldy: Pavlodarda medıtsınalyq baqylaý kúsheıtildi
ASTANA. KAZINFORM — Pavlodar oblysynda jalǵan medıtsınalyq anyqtamany paıdalaný faktisi anyqtalǵannan keıin medıtsınalyq qujattardy resimdeý men berýge baqylaý kúsheıtildi. Bul týraly oblystyq prokýratýra málimdedi.
Buǵan deıin áıel mas kúıinde jol-kólik oqıǵasyn jasap, júktilik týraly jalǵan anyqtama arqyly ákimshilik qamaqtan jaltarǵan. Prokýratýra qujattyń jalǵan ekenin anyqtap, nátıjesinde sot áıeldi 20 táýlikke ákimshilik qamaqqa aldy.
— Keıin jalǵan qujatty rásimdeýge baılanysty para alý jáne dáleldemelerdi burmalaý isi boıynsha kináli tulǵa sottaldy. Oǵan 6,6 mln teńge aıyppul salynyp, memlekettik qyzmette laýazym atqarý quqyǵynan ómir boıyna aıyryldy, — delingen habarlamada.
Prokýratýra jalǵan medıtsınalyq anyqtamany paıdalanýǵa múmkindik bergen sebepter men jaǵdaılardy zerdeledi. Nátıjesinde 5 laýazymdy tulǵa, onyń ishinde 2 basshy qatań tártiptik jaýapkershilikke tartyldy.
Sonymen qatar medıtsınalyq uıymdarda qujattardy resimdeý, esepke alý, saqtaý jáne berý tártibine baqylaý kúsheıtildi. Qujattardyń elektrondy nusqalaryn ózgertý múmkindigi de joıyldy.
Osylaısha, prokýratýra jalǵan anyqtama boıynsha kinálilerdi jaýapqa tartýmen qatar, osyndaı jaǵdaılardyń qaıtalanýyna jol bermeý úshin medıtsınalyq qujat aınalymy júıesine ózgerister engizdi.
Budan buryn Jańa adamdar astanalyq klınıkadaǵy jalǵan anyqtama satý deregin áshkerelegenin jazǵanbyz.
