Jalǵan zeınetkerler týraly qylmystyq is tergeýi aıaqtaldy
ASTANA. QazAqparat - Pavlodar oblysy Sybaılas jemqorlyqqa qarsy kúres jónindegi ulttyq bıýro departamenti asa iri kólemde bıýdjet qarajatyn jymqyrǵan tulǵalarǵa qatysty qylmystyq isti tergeýdi aıaqtady, dep habarlaıdy QazAqparat tilshisi.
Atap aıtqanda, «Azamattarǵa arnalǵan Úkimet» memlekettik korporatsııasynyń fılıaly - «Áleýmettik tólemder jónindegi vedomstvoaralyq esepteý ortalyǵynyń» oblystyq departamenti basshysynyń orynbasary Lýkashova jáne Pavlodar oblysy boıynsha Eńbek, halyqty áleýmettik qorǵaý jáne kóshi-qon komıteti departamentiniń basshysy Smaǵulova jáne ózge de tulǵalarǵa qatysty is qaraldy.
«Joǵaryda atalǵan qyzmetkerler óz laýazymdaryn paıdalanyp, uzaq ýaqyt boıy (2005 jyldan bastap) júıeli túrde 300 myńnan 1 mln teńgege deıingi aqshalaı syıaqyǵa Pavlodar oblysynyń zeınetaqy jasyna jetpegen turǵyndaryna zeınetaqy tólemderin zańsyz rásimdep keldi dep aıyptalýda», - delingen Uttyq bıýro habarlamasynda.
Áleýmettik tólemder jónindegi vedomstvoaralyq esepteý ortalyǵynyń burynǵy qyzmetkerlerinen quralǵan top «klıentter» izdestirip, zańsyz túrde zeınetaqy rásimdeýmen aınalysqan. Sáıkesinshe, memleketke 120 mıllıon teńgeden astam shyǵyn keltirgen elýden astam jalǵan zeınetkerler anyqtaldy. Olarǵa ıadrolyq polıgon aýmaǵynda turǵany týraly jalǵan arhıvtik qujattar, «kópbalaly analar» úshin - balalardyń týý týraly kýálikteri ázirlengen jáne osy jalǵan qujattar arqyly zeınetaqy taǵaıyndalǵan.
«2018 jyldyń 15 mamyrynan bastap, Smaǵulova úıqamaqta otyr, al Lýkashova 2018 jyldyń 31 mamyrynda qamaýǵa alyndy. Qazirgi ýaqytta aıyptaý aktisi bar qylmystyq is ári qaraı sotqa joldanýy úshin prokýratýraǵa jiberildi. Qylmystyq isti tergeý nátıjeleri boıynsha QR Eńbek jáne halyqty áleýmettik qorǵaý mınıstrligine jáne «Azamattarǵa arnalǵan úkimet» memlekettik korporatsııasyna sybaılas jemqorlyqqa jol bergen jaǵdaılardy retteý týraly usynym jiberildi. Quqyqbuzýshylyqtardyń aldyn alý maqsatynda atalǵan memlekettik organdardyń eńbek ujymdarymen kezdesý ótedi», - dep habarlady Ulttyq bıýronyń baspasóz qyzmeti.
