Jalǵan vaktsına pasportyn jasaýǵa qatysty 20 medqyzmetker ustaldy

NUR-SULTAN. QazAqparat – QR Іshki ister mınıstrliginiń resmı ókili Nurdildá Oraz jalǵan vaktsınatsııa pasporttary men PTR-anyqtamalardy satý faktileri týraly aıtty, dep habarlaıdy QazAqparat tilshisi.

«PTR-anyqtamalardy qoldan jasaǵany jáne jalǵan vaktsınalaý júrgizgeni úshin 28 adam áshkerelendi, onyń ishinde medıtsına qyzmetkerleri – 20, deldaldar – 8. Sondaı-aq áleýmettik jelilerge monıtorıng júrgizý kezinde jalǵan vaktsınatsııa pasporttaryn jáne PTR-anyqtamalardy satý týraly 70 habarlandyrý anyqtaldy, olardyń 37-i buǵattaldy», - dedi N. Oraz onlaın brıfıngide.

Onyń aıtýynsha, osy sanattaǵy ister boıynsha tergeý-sot tájirıbesi qalyptastyryldy, zańdy kúshine engen sot aktileri bar. Tórt qylmystyq is boıynsha aıyptaý úkimi shyǵaryldy.

«Al 43 qylmystyq is boıynsha tergeý áreketteri jáne saraptamalyq zertteýler júrgizilýde. Olar aıaqtalǵannan keıin kúdiktilerdiń is-áreketterin quqyqtyq baǵalaı otyryp, is júrgizý sheshimderi qabyldanady. Osyǵan uqsas barlyq qylmystyq isterdiń tergelýi baqylaýda», - dedi resmı ókil.

Aıta keteıik, jyl basynan beri vaktsınatsııa pasporttaryn jáne PTR-anyqtamalaryn jasaǵany úshin 110 qylmystyq is qozǵalǵan.

Sonymen qatar, keıbir týroperatorlar jalǵan vaktsınatsııa pasporttaryn satýmen aınalysqany belgili boldy.